VOV4. Bahnar - Jơ ‘năr au, Dơnŏ anĭh chĕp pơgơ̆r tĕh đak pơrô̆ hơvơn năm plang ăn pham iung jang hơdoi hăm Jơnŭm Chư pơglang ƀrê Việt Nam, Viện Huyết học – Truyền máu Trung ương hlôi pơgơ̆r Pôk pơ ư 100 ‘nu bơngai plang ăn lơ pham lơ̆m tĕh đak sơnăm 2022 hăm hơnăn “Kơtrĭu plei nuih, tơdrŏ mĭnh ‘măng, plang ăn pham dŏng erĭh bơngai”. Lơ̆m 100 ‘nu bơngai plang ăn pham đei pôk pơ ư sơnăm au, đei lơ bơngai vang plang ăn pham hơnơ̆ng, plang ăn pham lơ̆m khei ‘năr hăt hot; adoi hlôi hơdrin chă hơvơn kơ hrĕng ‘nu bơngai vang plang ăn pham. Yă Bùi Thị Hòa, Kơdră chĕp pơgơ̆r Jơnŭm chư pơlang ƀrê Việt Nam, Dơnŏ anĭh bơ̆ jang chĕp pơgơ̆r Tĕh đak hơvơn plang ăn pham sơkơ̆t hơdăh: Jing khŭl gĭt kăl hlŏh, rim kang ƀô̆, rim bơngai jang Chư pơglang ƀrê hlôi iung jang tôch nŏng, hơdrin đĭ ai iung jang hơdoi hăm hơnĭh jang pơgang, hăm rim hơnĭh bơ̆ jang vă pơtho tơbăt, chă hơbơn kon pơlei păng vang năm plang ăn pham hloi.

Tơblơ̆ nơ̆r: Amazưt