VOV4.Bahnar - 43 ‘nu hŏk tro, sinh viên dơnŭh hŏk hơgei “Lơ̆m tơdring jang ba ŏh năm tơ̆ hnam trương păng Kon mŏm Ƀô̆ đô̆i vei lăng Sơlam tĕh đak” tơ̆ Dak Lăk đei pôk pơ ư lơ̆m pơgê năr 12/8, tơ̆ tơring sơlam tĕh đak Ea Na, apŭng Buôn Đôn (Dak Lăk).

Kơdră chĕp pơgơ̆r Ƀô̆ đô̆i vei lăng Sơlam tĕh đak Dak Lăk hăm rim bơngai đei jơhngơ̆m đon ‘lơ̆ng pôk tang vang năn rim đe mon hŏk tro dơnŭh oei tơ̆ tơring sơlam tĕh đak

Atŭm hăm pôk pơ ư, rim đe ŏh đei sơng iŏk tơmam drăm pôk ăn nhen: kon jên, gre tang vang, kơsơ̆p hla bơar hŏk, hla bơar chĭh, hơbĕn ao ‘nao păng tơmam drăm hŏk pơhrăm. Dêh char Dak lăk đei vă jê̆ 73km trong sơlam tĕh đak hăm dêh char Muldunkiri kơ tĕh đak Campuchia. Tơ̆ au 4 tơring sơlam tĕh đak Ea Bung, Ia Lốp, Ia R’vê găh apŭng Ea Sŭp păng tơring Krông Na kơ apŭng Buôn Đôn, jei jing tơring đei lơ ŭnh hnam dơnŭh. Hơlêm hăm tơdrong tơnap tap kơ kon pơlei tơring sơlam tĕh đak, khŭl Ƀô̆ đô̆i vei lăng Sơlam tĕh đak dêh char Dak Lăk ling lang lăng ba kơ jăp trŭh tơdrong oei sa, jang sa kơ kon pơlei, hăm rim trong jang hơ iă. “Tơdrong jang ba ŏh năm tơ̆ hnam trương păng Kon mŏm kơđông ƀô̆ đô̆i vei lăng sơlam tĕh đak” tơ̆ Dak Lăk hlôi pơjing rơvơn ăn kơhrĕng hŏk tro dơnŭh đei năm tơ̆ hnam trương, hơnơ̆ng hŏk pơhrăm hơdrin hlŏh dơ̆ng.

Tơblơ̆ nơ̆r: Amazưt