Pơma tơ̆ hop akŏm, Kơdră Quốc hội Trần Thanh Mẫn, Kơdră Jơnŭm Pôk rơih kơ teh đak pơma hơdăh tơdrong pôk rơih hlôi jơnei ‘lơ̆ng hơiă, tơpă jing ‘măng hŏk hôp chĭnh trĭ jrŭ să, năr akŏm tih kơ đĭ đăng kon pơlei, đei tơpôl lơ̆m păng ‘ngoăih teh đak chih iŏk, lăng ‘lơ̆ng. Pơtôch, bơngai tăh hla lơ̆m teh đak hlôi pôk tôm 500 ‘nu bơngai tang măt Quốc hội, 2.552 ‘nu bơngai tang măt Jơnŭm pơgơ̆r kon pơlei tơ̆ dêh char păng 72.438 ‘nu bơngai tang măt Jơnŭm pơgơ̆r kon pơlei tơ̆ xăh.

Dôm kơsô̆ âu ăn ƀôh tơdrong jang vei lăng hơmet ăn bơngai jang đei pơgơ̆r kơjăp, tơpăt, trŏ tơdrong hơgăt khôi luơ̆t. ‘Nâu kŭm jing tơdrong gĭt kăl lơ̆m tơdrong jang hơmet tôm Teh đak chĕp kơ̆l pơgơ̆r kiơ̆ xã hội chủ nghĩa đơ̆ng Kon pơlei, yua đơ̆ng kon pơlei păng yua kơ kon pơlei, hơdai hăm pơtrŭt tơplih ‘nao khŭl jang, vei lăng khŭl kơdră chĕp kơ̆l tơringc 2 tăl păng tŭn pran tơplih ‘nao, iŏk yua kơmăy kơmŏk lơ̆m vei lăng tơpôl.