Tơdrong jang pôk rơih bơngai tang măt Quốc hội jăl XVI păng bơngai tang măt Jơnŭm pơgơ̆r kon pơlei jơ̆p tơring jăl jang 2026–2031 tơ̆ dêh char Đắk Lắk pơgơ̆r ƀlep tơdrong, vei sơđơ̆ng ‘lơ̆ng, tơpăt păng trŏ tơdrong hơgăt đơ̆ng khôi luơ̆t.

Kiơ̆ roi tơbăt đơ̆ng Anih pơgơ̆r Pôk rơih dêh char Đắk Lắk, lơ̆m dêh char đei vă jê̆ 2,3 triệu ‘nu bơngai tăh hla vang pôk rơih. Jô̆ truh 7 jơ kơ măng ‘năr 15/3, kơsô̆ bơngai tăh hla năm tăh kơphiê̆u đei hloh 99,9%. Kăl kơ lăng truh, hlôi đei lơ xăh, phường, jang đang 100% kơsô̆ bơngai tăh hla vang tăh kơphiê̆u. Iŏk yua âu ăn ƀôh jơhngơ̆m đon tơnăp, tơdrong drơ̆ng lăp păng đon hlôh vao ‘lơ̆ng đơ̆ng bơngai tăh hla lơ̆m dêh char.

Kiơ̆ kơ Anih pơgơ̆r pôk rơih dêh char Đắk Lắk, mă đơ̆ng kơsô̆ bơngai tăh hla vang tăh kơphiê̆u iŏk đei tôch kơ lơ, rim tơring lơ̆m dêh char oei ưh kơ pơm pơ hơi, hơnơ̆ng tơlĕch jang hrơ̆ch rim trong jang vei sơđơ̆ng tơ̆ rim hơnih tăh kơphiê̆u. Khŭl lĭnh kŏng an, ƀô̆ đô̆i păng rim khŭl jang kơpal pơvei tơdrong jang dăr hơlen, hơlen lăng, băt hơdăh tơdrong tơ̆ tơring, ling lang hơmet pơ ‘lơ̆ng rim tơdrong đei ƀôh, vei sơđơ̆ng tơdrong pôk rơih pơgơ̆r sơđơ̆ng ‘lơ̆ng.