Hơtuch khei 8 âu ki, tơdrong jang Drŏ kăn bí thư livestream tĕch sầu riêng kŭm hăm kon pơlei hlôi pơgơ̆r tơ̆ pơgar sầu riêng jang pơlong lăng kơ xăh Ea Knuếc, dêh char Đăk Lắk. Đơ̆ng pơgê hrôih, dôm plei sầu riêng đum jơk đei tăh hơmet pơ ‘lơ̆ng lơ̆m reo livestream lơ̆k khăn tanh. Tơ̆ kơƀang ming điên thoăi pơih camera kơtă, hơnih yă H’Jih Kbuôr (aduôn Trúc) ‘măng mă blŭng jing “bơngai tĕch tơmam online” kơ pơlei pơla. Tơ oei ƀơ̆t hơnăp man hinh điên thoăi, yă H Jih kŭm hăm drŏ kăn chĕp kơ̆l xăh tơroi kơ tơdrong pơtăm sầu riêng păng roi tơƀôh hăm rim bơngai găh kơ loăi tơmam đơ̆ng choh jang sa tôch kơ ‘lơ̆ng yua đơ̆ng ŭnh hnam sư pơm tơlĕch. Yă H Jih Kbuôr tơroi:

“Inh truh tơ̆ âu hăm drŏ kăn bí thư xăh vă tơroi găh pơyan pơm tơlĕch sầu riêng. Kon pơlei ‘meh vă akhan sầu riêng gô đei kơjă vă kơ tơdrong hơrih sa kơ kon pơlei roi ‘năr roi đei ƀôh păng hơtŏk tơiung lơ hloh”.

Lăp lơ̆m 1 ‘măng pơih tĕch kơtă, 60 tấn sầu riêng hlôi đei tĕch. Dôm hla ar răt tơmam pơtrơp băl, dôm nơ̆r tơtă hơiă đơ̆ng tơroi đei ƀôh lơ̆m man hinh pơm ăn kon pơlei chơt hơiă. Hăm hơnăn “Sầu riêng Amí kâo”, nơ̆r Ê Đê vă khan “sầu riêng mĕ ĭnh”, pơlei pơla ưh khan lăp tĕch tơmam, mă oei tơroi tơdrong găh trong pơm tơlĕch, hăm tơdrong tơƀôh hơdăh păng nơ̆r pơkăp găh tơdrong ‘lơ̆ng. Đơ̆ng âu, mĭnh trong năm ‘nao găh hơtŏk hơnăn tơmam đơ̆ng choh jang sa lơ̆m kơmăy kơsô̆; trong gơh băt tơ jê̆ tơmoi ‘nao, kơtă hloh tŏk bŏk ƀrư̆ ƀrư̆ pơih ăn.

Ƀok Nguyễn Công Điềm, bơngai Nùng, tơ ‘ngla tơdrong jang sầu riêng đei rơih pơm pơlong pơgơ̆r ‘măng tĕch tơmam, lăng ƀôh đei yua rơđăh đơ̆ng tơdrong tĕch mơdro lơ̆m điên tư, kŭm đei ƀôh đon tơchĕng pơjing 1 hơnih tĕch tơmam hơdrô̆.

“Kơdih kâu ĭnh kŭm ‘meh đơ̆ng rŏng âu pơm liơ đei 1 hơnih hơdrô̆ vă tơgoăt đơ̆ng bơngai pơm tơlĕch păng bơngai răt yua, ba gô sơđơ̆ng jơhngơ̆m ‘noh jĭ ưh pă ‘moi kiơ̆ đơ̆ng bơngai răt bơngai tĕch bơih”.

Tơdrong livestream âu ‘noh jĭ tơdrong jang iung jang hơdrol vă pơm kiơ̆ Tơdrong jang Mĭnh xăh, phường mĭnh bơngai tơƀôh trong ăn tơpôl -KOL (Key Opinion Leader - Bơngai đei bưng ai tơm dơnơm, hơnhăk tơmam ‘lơ̆ng kơ Đắk Lắk tơ̆ hơnih kơsô̆ kơ xăh Ea Knuếc. Um rup 1 bí thư xăh jing bơngai tơƀôh trong ăn tơpôl găh choh jang sa hlôi tưk tơiung tơdrong ‘lơ̆ng tih ăn kon pơlei. ‘Nâu kŭm trong jang ‘nao găh “lăm pơtho kon pơlei gơh yua kơmăi kơsô̆” vă kon pơlei jang chŭn mir, mă loi ‘noh kon pơlei kon kông, pơ̆n nuih ƀiơ̆ lơ̆m gơh băt tĕch mơdro lơ̆m điên tư. Yă Ngô Thị Minh Trinh, Bí thư Đảng ủy xăh Ea Knuếc pơma hơdăh: Kơtă hăm kon pơlei livestream tĕch sầu riêng, ưh khan lăp pơm tơgŭm tĕch răt tơmam pơyan jang mă oei jing nơ̆r pơma pran kơtang: kơdră chĕp kơ̆l năm hơdrol, pơm jŭk yŭk trong hơlâu, dui rim bơngai vang mơ̆t lơ̆m kơmăy kơsô̆.

“Ĭnh ‘meh rim ‘nu kon pơlei vang hơdai băl lơ̆m tơdrong jang tơplih kơsô̆ âu, đơ̆ng dôm kon pơlei kơsô̆, gơh livestream tĕch tơmam tơ̆ hnam, vang roi tơƀôh dôm tơdrong ‘lơ̆ng hơiă kơ pơlei pơla truh hăm rim bơngai, truh hăm tơmoi vă đei băt truh păng đe truh hăm bơ̆n lơ hloh. Hơdai hăm kon pơlei jang chŭn mir hơnhăk dôm tơmam đơ̆ng choh jang sa đơ̆ng kơdih tĕch tơ̆ anih tĕch mơdro păng kŭm tơplih ƀrư̆ ƀrư̆ hăm tơdrong joăt, vang hơdai vă kơ đĭ đăng kon pơlei gơh yua kơmăy kơsô̆”.

Hăm tơdrong mơ̆t jang đơ̆ng pơđĭ khŭl jang, đơ̆ng kang ƀô̆, kơdră chĕp kơ̆l truh rim ‘nu kon pơlei, tơdrong jang “pơlei pơla kơsô̆” jing rơđăh păng kơjăp. Ưh khan lăp tơ̆ Ea Knuếc, lơ tơring lơ̆m dêh char Đắk Lắk tŏk bŏk vang hơdai bơ̆jang kiơ̆ ‘lơ̆ng tơdrong jang ‘nâu. Đơ̆ng dôm tơdrong jang nhen phĭn rup tơmam, pơm video kơđeh, tơl nơ̆r đe pơma dơnuh, tăh hơmet păng pơjao tơmam truh tơdrong pơih camera, livestream păng hla ar răt tơmam, jing trong jang tơpă yan âu vă ƀrư̆ ƀrư̆ hơnhăk kơmăy kơmŏk lơ̆m tơdrong hơrih sa pơm tơlĕch choh jang sa tơ̆ rim pơlei pơla.

Ƀok Bùi Thanh Toàn, Kơdră vei lăng Anih jang Khoa hŏk păng Kơmăy kơmŏk dêh char roi tơbăt, tơdrong ‘lơ̆ng kơtang lơ̆m tơplih kơsô̆ ‘noh jĭ anih jang kăl. Yua thoi noh, tơdrong hơmet ming “tơring ưh kơ iŏk đei hơyuh” đei dêh char bơngơ̆t truh tơlĕch jang hăm tơdrong hơgăt đĭ đăng kon pơlei gơh yua Internet jơ̆p jang, vang tĕch mơdro hăm điên tư lơ̆m sơnăm ‘nâu.

“Anih jang khoa hŏk păng kơmăy kơmŏk hlôi jang hơdai hăm rim anih jang đei ƀơm truh jang tơgŭm ăn Anih vei lăng kon pơlei dêh char vă athei rim anih mơdro sa viễn thông, kơmăy kơmŏk kơtơ̆ng ang vang hơdai băl mơ̆t jang, hơdrin truh đĭ sơnăm 2025 ‘noh lơ̆m dêh char gô ưh pă đei tơring ưh kơ iŏk đei hơyuh mạng. Mưh đei tôm anih jang kăl, tôm Internet jơ̆p jang ‘noh kon pơlei mă đei tơdrong hiôk gơh băt dôm tơdrong hlôh vao tơplih kơsô̆”.

Đơ̆ng tơdrong jang kơmăy kơsô̆, dêh char Đắk Lắk tŏk bŏk iŏk yua tơdrong hơgăt mŭk drăm kơsô̆ ăn kơ rim xăh, phường. Kŭm hăm tơdrong hơtŏk tơiung khoa hŏk, kơmăy kơmŏk, tơplih hơgei păng tơplih kơsô̆ lơ̆m choh jang sa, tĕch mơdro păng tơmang lăng, dêh char tŏk bŏk pơm pơjing 1 um ai tơring tơrang ‘nao truh rim pơlei pơla. Mưh kon pơlei jang chŭn mir băt pơm tơ ‘ngla kơmăy kơmŏk, ‘noh tơring tơrang ‘nao ưh khan lăp jing trong ƀê tŏng dăh mă pơbŭng hnam ‘lơ̆ng, mă oei jing hơnih hơrih hơgei, tơgoăt hơdai păng ƀĕnh tơdrong ‘lơ̆ng hơiă. Lơ̆m hơnih ‘noh, mĭnh điên thoăi hơgei jing tơmam bơ̆jang kơ kon pơlei jang chŭn mir.