Pơgơ̆r đơ̆ng dang ei truh năr 5 Têt, Lêh akŏm Têt Việt Quý Mão 2023 hơdăh hăm cham char "Kơphô̆ Ƀok đồ" hăm pơhlom 50 ƀok đồ mơlôh atŭm hăm đak mư̆k tau hla bar brê tơ oei chih chư ăn tơmoi.

Cham char akŏm lêh pơm hơdăh kơlih hloh 100 tơm pơkao rŭng reng pơrŏ kiơ̆ um ai ngê̆ thươ̆t tơgŭm ăn tơmoi băt hơdăh pơyan puih mak hlôi truh tơ̆ pơlei tơm đei hơnăn Ƀok Hô. Atŭm hăm noh, tơ̆ âu duh pơgơ̆r dôm tơdrong akŏm pơchơt ăh 'năr Têt nhen: man um lâ̆n, chrăh um đơ̆ng 'long tơngơ̆l, bieh um yang, aniha kŏm tơmam xa hăm unh kơđeng jâu, anih 'măn pơdăh ao tai... Tơ̆ âu oei đei lơ tơdrong jang 'mêm kơ eng, tơrĕk Têt ăn kon pơlei nhen: Tơdrong akŏm "Tong gre pơyan puih mak" 'nhăk sinh viên vih pơlei pơla xơng Têt "Tong gre hơkŭm rơhŏ" ăn kŏng nhơ̆n brŏk tơ̆ pơlei pơla, akŏm tơjrâ̆m đe sinh viên xơng Têt ataih đơ̆ng hnam..., tơ̆ Lêh pơtơm, jơnŭm pơgơ̆r hlôi pôk tơmam Têt ăn đe hơ-ioh đei tơdrong erih tơnap tap, hơ-ioh pơti mĕ ƀă kơyuơ đơ̆ng pơrang jĭ Covid-19.