VOV4.Bahnar - Hăm trong tơlĕch jang “Nuih mơng, hơpơi ‘mĕh vă, pơm jŭk, tơchăr hơgei”, pơgê năr 12/10, 450 ‘nu kơdră tang măt gơ̆h hơgei ăn hơdrŭh tơdăm ƀô̆ đô̆i hlôi vang năm Pơm lêh Hop akom Kơdră tang măt Đoàn Hơdrŭh tơdăm Cộng sản Hồ Chí Minh Khŭl Ƀô̆ đô̆i ‘măng mă 10, jăl jang 2022-2027. Iung pơma pơrô̆ pơrôp tơ̆ hop akom, tang măt ăn Khŭl Kơdră chĕp pơgơ̆r Đảng Ƀô̆ đô̆i Trung ương, Kơdră chĕp pơgơ̆r Khŭl Ƀô̆ đô̆i vei lăng sơlam tĕh đak, Đại tướng Phan Văn Giang hôn bơnê dôm tơdrong tơgop tĭh tên păng tơdrong gơ̆h hơgei kơ hơdrŭh tơdăm Khŭl Ƀô̆ đô̆i; Adoi pơma hơdăh tơdrong jang kơ kĕch mang, kơ Khŭl Ƀô̆ đô̆i lơ̆m chăl hle pơjao ăn khul hơdrŭh tơdăm pơma atŭm păng hơdrŭh tơdăm Ƀô̆ đô̆i pơma hơdrô̆ tôch tĭh tên, trăp trĭn. Pơma hơdăh 5 tơdrong jang vă akŏm jơhngơ̆m iung jang kơtang, hơnăp jang tơnăp, tơchăr hơgei đơ̆ng hơdrŭh tơdăm păng bơ̆ jang đoàn lơ̆m au Đại tướng Phan Văn Giang pơma hơdăh kăl atŏk kơtang pơtho pơhrăm chĭnh trĭ, jơhngơ̆m đon oei sa ‘lơ̆ng hơ iă ăn hơdrŭh tơdăm, kơrŭn jơhngơ̆m hơdrin jang keh đang dôm tơdrong đei pơjao, tơgop tơ iung pơjing păng vei lăng kơ jăp iăp kơtang Tĕh đak Việt Nam xã hội chủ nghĩa.

VOV/Amazưt tơblơ̆