VOV4.Bahnar - Đơ̆ng rŏng 2 năr bơ̆ jang, pơgê năr 14/10, Pơm lêh Hop akŏm kơdră tang măt Đoàn Hơdrŭh tơdăm Cộng sản Hồ Chí Minh dêh char Gia Lai ‘măng mă XV (jăl jang 2022-2027) jơnei keh kong.

Pơm lêh hop akŏm hlôi pơdrơ̆ng kiơ̆ rim trong tơlĕch jang jăl jang 2022-2027. Lơ̆m au, rim sơnăm, 100% kang ƀô̆ Đoàn, bơngai jang đoàn, 80% hơdrŭh tơdăm đei hŏk pơhrăm, jang kiơ̆, pơtho tơbăt tơdrong tơchơ̆t, trong bơ̆ jang đơ̆ng Đảng, trong bơ̆ jang tơgŭm djru, khôi luơ̆t kơ Tĕh đak păng tơdrong tơchơ̆t, trong bơ̆ jang kơ Đoàn. Lang să khŭl jang ‘lơ̆ng lơ̆m hŏk pơhrăm păng pơm kiơ̆ jơhngơ̆m đon ‘lơ̆ng, bơ̆ jang hơgei kơ Ƀok Hô. Rim sơnăm, pơtăm ‘nao tŏ sĕt hloh 300.000 dơnơm ‘long. Iung jang hơdoi pơchŏh trong pơjing tơdrong jang ăn hlŏh 40.000 ‘nu hơdrŭh tơdăm kon kông; tơroi tơbăt, tơchă tơdrong jang ăn 20.000 ‘nu hơdrŭh tơdăm ... Pơm lêh hop akŏm pôk rơih Khŭl kơdră chĕp pơgơ̆r Đoàn dêh char Gia Lai jăl jang XV đei 40 ‘nu; Khŭl chĕp pơgơ̆r Dơnŏ anĭh Đoàn dêh char đei 11 ‘nu; Rim kơdră tang măt jei hlôi pôk 11 ‘nu kơdră tang măt vang năm Pơm lêh Hop akŏm kơdră tang măt Đoàn Hơdrŭh tơdăm Cộng sản Hồ Chí Minh lơ̆m tĕh đak ‘măng mă XII, jăl jang 2022-2027.

VOV Tây Nguyên/Amazưt tơblơ̆