VOV4.Băhnar - Kơsơ̆ năr 16/3, tơ̆ pơlei tơm Hồ Chí Minh, Kơdră chĕp pơgơ̆r tĕh đak Nguyễn Xuân Phúc vang năm Pơm lêh pôk ăn Hơnăn Ƀô̆ đô̆i nuih mơng ăn nhap ƀok Lữ Minh Châu, sơ̆ jang Kơ iĕng Kơdră chĕp pơgơ̆r Dơnŏ anĭh bơ̆ jang Jên hu gĭt kăl N2683, Kơdră so Dơnŏ anĭh mong jên Tĕh đak Việt Nam. Tang măt ăn Kơdră chĕp pơgơ̆r Đảng, Tĕh đak, Kơdră chĕp pơgơ̆r Tĕh đak Nguyễn Xuân Phúc hlôi pơjao ăn Hơnăn Ƀôi đô̆i nuih mơng pran kơtang ăn bơngai tang măt ŭnh hnam nhap ƀok Lữ Minh Châu. Iung pơma tơ̆ jơ Pơm lêh, Kơdră chĕp pơgơ̆r Tĕh đak Nguyễn Xuân Phúc pơma hơdăh, rŏ năng vă pơma lơ̆m tơdrong tơblăh vang kơtang hlŏh tơ̆ kơdrăn tơblăh tơring Pơbăh, hăm kơchư̆k jang Kơ iĕng Kơdră chĕp pơgơ̆r Dơnŏ anĭh bơ̆ jang jên hu gĭt kăl, nhap ƀok Lữ Minh Châu atŭm hăm rim kơdră lơ̆m Dơnŏ anĭh bơ̆ jang Jên hu gĭt kăl hlôi tơlech jang ‘lơ̆ng tơdrong jang tơgŭm ăn Dơnŏ anĭh bơ̆ jang Mŭk drăm jên hu Trung ương Cục miền Nam, ư̆h kơ ‘nhoen tơnap tap, hrat hrĭn, nuih mơng, gơ̆h hơgei yak hlŏh rim trong bơ̆ jang dăr lăng kơ hret đơ̆ng ayăt vă chơ ba sơđơ̆ng ‘lơ̆ng hơ iă kơ hrĕng trĭu dolar, pơtrŭh tĕnh koăng ăn khŭl jang, tơgŭm tơtom ăn tơdrong ‘mĕh vă kơ kĕch mang tơring Pơbăh, jang keh đang tơdrong jang đei Dơnŏ anĭh tơm Chĭnh trĭ, Trung ương Đảng păng Khŭl kơdră chĕp pơgơ̆r tĕh đak lui kiơ̆ pơjao ăn.

Tơblơ̆ nơ̆r: Amazưt