VOV4.Bahnar - Năr brei (5/10) tơ̆ pơlei tơm Nha Trang, dêh char Khánh Hòa hlôi pơbơ̆r Pơma dơnŭh găh Đak Dơsĭ ‘măng mă 9 hăm hơnăn “Chă tơchĕng hơlen khoa hŏk đak dơsĭ: Tơ iung pơjing jơhngơ̆m đon lui păng pơjing đei cham char sơđơ̆ng”.

Rup hop akŏm

Tơdrong pơgơ̆r au kơ yuơ Hnam trương pơtho pơhrăm jang Tơbôl, Dơnŏ anĭh tang măt Anh tơ̆ Việt Nam, Hơnĭh mong jên jang Konrad Adenauer Stiftung (KAS) vang pơgơ̆r. Pơma dơnŭh Đak dơsĭ ‘măng mă 9 hơvơn đei vă jê̆ 200 ‘nu bơngai tang măt apŭng plĕnh tĕh păng lơ̆m tĕh đak vang năm hop akŏm kơtă păng trư̆k tuyên. Phó Giáo sư - Tiến sĩ Nguyễn Chu Hồi, Kơ iĕng Kơdră chĕp pơgơ̆r Khŭl jang ka hơdang Việt Nam tơbăt, khoa hŏk kmăi kmŏk ‘nŏh tơdrong jang tôch gĭt kăl lơ̆m atŏk tơ iung mŭk drăm, vei lăng pơm tơm kơdĭh tĕh đak. Vă đei jing tĕh đak pran kơtang găh đak dơsĭ ‘nŏh kăl đei khoa hŏk kmăi kmŏk gơ̆h hơgei, iung jang tơ đak dơsĭ đei jơnei, đak dơsĭ kăl đei vei lăng kơ jăp atŭm đơ̆ng rim tĕh đak. Phó Giáo sư - Tiến sĩ Nguyễn Chu Hồi athei, ‘moi kiơ̆ jang tơbôl, rim tĕh đak tơ iung pơjing jơhngơ̆m đon lui kiơ̆ chĭnh trĭ vă jang hơdoi khoa hŏk găh đak dơsĭ. Adoi tơ iung pơjing hơnĭh bơ̆ jang vei lăng găh jang hơdoi chă tơchĕng hơlen khoa hok găh  biển Đông.

VOV/Amazưt tơblơ̆ nơ̆r