VOV4.Bahnar - Pơgê năr 21/3, tơ̆ Hơnĭh tơm Viêng Chăn - Lào, Kơdră chĕp pơgơ̆r Dơnŏ anĭh tơm Pơ prŏ tơdrong jang păng Tơmơ̆t jên jang Việt Nam, Kơdră chĕp pơgơ̆r Dơnŏ anĭh bơ̆ jang hơdoi Việt Nam-Lào Nguyễn Chí Dũng hăm Kơdră chĕp pơgơ̆r Dơnŏ anĭh tơm Pơ prŏ tơdrong jang păng Tơmơ̆t jên jang Lào, Kơdră chĕp pơgơ̆r Dơnŏ anĭh bơ̆ jang hơdoi Lào-Việt Nam Khăm-Chên Vông-Phô-Sỷ vang pơm tơm ‘Măng pơma dơnŭh hơnĭh mơdro sa Việt Nam-Lào vă atŏk kơtang tơlĕch jang kiơ̆ rim tơdrong vă jang tơmơ̆t jên jang tĭh kơ hơnĭh mơdro sa Việt Nam tơ̆ Lào păng pơtrŭt kơtang mĭnh ƀar tơdrong jang hơdoi tơmơ̆t jên jang hle, gĭt kăl lơ̆m khei năr kơnh.

Ƀok Nguyễn Chí Dũng sơkơ̆t hơdăh, lơ tơdrong vă jang tơmơ̆t jên jang đơ̆ng Hơnĭh mơdro sa Việt Nam tơ̆ Lào jang sa iŏk yua kơ jăp, tơgop kơtang lơ̆m atŏk tơ iung mŭk drăm-tơpôl, pơjing tơdrong jang păng jang sa iŏk yau kơ jăp ăn rơbau ‘nu bơngai jang, tơmơ̆t dơ̆ng kon jên bơ̆ jang tĕh đak Lào, mă kăl lơ̆m tơdrong jang kmăi kmŏk pơre nơ̆r, tơdrong jang jên hu, pơtăm păng pơm tơlĕch kơsu, jangphe ƀa, tơmam drăm sa, đak tŏh rơmo ...  vang tơgop lơ̆m thuê̆ păng hơnăp jang jên hu anai đơ̆ng hơnĭh mơdro sa Việt Nam ăn tĕh đak Lào lơ̆m 5 sơnăm tơjê̆ au iŏk đei hlŏh 1 ti dolar.

Tơblơ̆ nơ̆r: Amazưt