Năr 25/3, hloh 550 ‘nu kon pơlei rôp ka hơdang tơ̆ phương La Gi hăm tơring Tân Hải, dêh char Lâm Đồng hlôi vang năm ‘măng pơgơ̆r pơpơm xek tơlang pơrô̆ tơbăt tang găn chă rôp ka hơdang glăi, ưh tơroi tơbăt păng ưh kơ pơm kiơ̆ tơdrong tơchơ̆t (IUU). Tơdrong pơgơ̆r ou kơ yuơ Khul jang vei lăng rôp ka hơdang kơsô̆ 4, Hơnih tơm chĕp pơgơ̆r Tơring Kanh sat đak dơsĭ 3 iung jang hơdoi hăm Hơnih bơ̆ jang Pơtho tơbăt păng Pơrô̆ pơrôp kơ Đảng dêh char, Hơnih xek tơlang dêh char pơgơ̆r. ‘Măng pơgơ̆r xek tơlang đei pơm kiơ̆ nhen yan ou kơ tơdrong pơm glăi kơtang đei ƀơm truh pơm glăi “Chơ bơngai kơdou năm tơ̆ teh đak đe” păng “Pơm tơsul tơsăl dôm tơdrong jang kmăi kmŏk điên tư”. ‘Moi kiơ̆ pơpơm kiơ̆ pơm dơ̆ng trong iung jang dăr lăng, tơkêng, xek tơlang, tơdrong jang tơgŭm kon pơlei rôp ka hơdang băt hơdăh găh rim tơdrong tơchơ̆t Khôi luơ̆t găh rôp ka hơdang. Lơ tơdrong kăl đei tơƀôh hơdăh nhen tơchơ̆t găh tơring gơ̆h rôp ka hơdang, vei lăng duk rôp ka hơdang, tơdrong pơm glăi IUU ‘noh gô xek tơlang kơhret, adoi nhen dôm tơdrong chă plôih hŭt kmăi kmŏk dăr lăng hơlen jơ ‘năr duk kơdou.