Hăm hơgăt teh să truh 24.000 km² păng măt bơngai kon pơlei vă jê̆ 4 triu ‘nu, Lâm Đồng đei pơchoh ăn jing hơnih tŏk kơtang kơ tơring Tơmăn Nam Trung Bộ păng Tây Nguyên. Kiơ̆ pơprŏ vă jang, tơdrong atok tơ iung đei pơgơ̆r kiơ̆ pêng tơring tơm pơđĭ groi kông, tơring tơmăn păng tơring hơvĕn. Lơ̆m ou, tơring Đức Trọng, Đơn Dương, Lâm Hà păng Di Linh đei pơprŏ atŏk tơ iung tơring kơdrơ̆m tơklep hăm Hơnih tơm bơ̆ jang-chinh trĭ kơ dêh char đei pơjing tơ̆ tơring Đức Trọng. Tơring Đà Lạt đei pơjing hơnih tơm oei sa joh ayŏ, pơtho pơhrăm, khoa hŏk kmăi kmŏk păng tơmang pơhiơ̆ cham char, hơnih pơdơ̆h pơdei hơtŏ hăm teh đak đe.

Kiơ̆ đơ̆ng ƀok Tôn Thiện San, Kơdră chĕp pơgơ̆r Hơnih bơ̆ jang jên hu dêh char Lâm Đồng, dêh char gô pơjing 6 tơring jang mŭk drăm Tu-Pơbăh păng Hơlĕch-Pơmơ̆t, tơgoăt hăm rim tơring kăl đơ̆ng groi kông truh tơ̆ đak dơsĭ. Akŏp tơdrong ‘meh vă tơmơ̆t jên jang jăl jang 2026-2030 ‘noh dang hloh 1 triu ti hlak jên, lơ̆m ou kon jên ‘ngoaih jên bơ̆ jang teh đak tơmơ̆t  80%.“Pơprŏ vă jang dêh char hlôi sơkơ̆t hơdăh hơvơn tơmơ̆t jên jang lơ̆m rim tơdrong jang, tơdrong kăl, tơdrong đei, rơvơn păng kĕ tŏk mŭk drăm ‘nao ăn dêh char. Lơ̆m ou trong nơnăm, logistics, atok tơ iung tơring kơdrơ̆m, tơmang pơhiơ̆ ‘lơ̆ng liĕm, choh jang sa jang kiơ̆ kmăi kmŏk hơgei, kmăi kmŏk pơm tơlĕch tơmam drăm, ŭnh hơyuh, mơdro sa, pơtho pơhrăm, jang pơgang, oei sa joh ayŏ, đă ƀŏng lŏng tơplŏng kơdou, tơplih kơsô̆, khoa hŏk kmăi kmŏk păng tơplih ‘nao tơchăr”.

Ƀok Hồ Văn Mười, Kơdră jang lơ̆m Trung ương Đảng, Kơdră chĕp pơgơ̆r Hơnih vei lăng kon pơlei dêh char Lâm Đồng tơbăt, tơdrong hơmet ming pơprŏ vă jang jĭ tôch gĭt kăl lăp đơ̆ng rŏng hơgrop pêng dêh char Lâm Đồng, Bình Thuận păng Đắk Nông, pơjing đei trong jang kăl ăn jăl atŏk tơ iung ‘nao. Kơdră chĕp pơgơ̆r Hơnih vei lăng kon pơlei dêh char Lâm Đồng sơkơ̆t hơdăh, Lâm Đồng hrei ou jĭ dêh char đei hơgăt teh să hloh lơ̆m teh đak, đei lơ tơdrong rơvơn găh mŭk drăm lơ̆m teh, ŭnh hơyuh, choh jang sa kmăi kmŏk hơgei păng tơmang pơhiơ̆, kơ yuơ lơ loh kăl đei mĭnh trong pơprŏ ‘nao vă iung jang ‘lơ̆ng dôm tơdrong đei, pơjing hơyak pran ăn tŏk mŭk drăm đunh đai tai sơnăm.“Hơmet ming pơprŏ vă jang ‘măng mă ou tơƀôh hơdăh tơdrong hơdrin đĭ ai đơ̆ng dêh char lơ̆m tơplih ‘nao jơhngơ̆m đon tơchĕng atŏk tơ iung, iŏk kon pơlei păng hơnih mơdro sa pơm tơdrong tơm, lăng ,khoa hŏk kmăi kmŏk, tơplih ‘nao tơchăr, tơplih kơsô̆ păng tŏk rơgoh ‘lơ̆ng jĭ hơyak pran. Lăng truh trong tơlĕch ăn tơ iung pơjing Lâm Đồng jing hơtok tŏk mŭk drăm hơ̆bĕch hơbal hloh lơ̆m tơring Tây Nguyên păng Nam Trung Bộ. Pơprŏ vă jang ưh khan lăp sơkơ̆t hơdăh trong tơlĕch ăn atŏk tơ iung ƀơ̆t măt mă oei pơih ăn đei lăng truh đunh đai tai sơnăm; ưh khan lăp iung jang iŏk đei jơnei rim tơdrong rơvơn đei mă oei pơjing hơyak pran kơtang ăn pơjing đei hơyak pran kơtang hloh atŏk tơ iung ‘nao”.