Đơ̆ng sơnăm 2013 trŭh dang ei, lơ̆m tĕh đak hlôi pơprŏ tơring pơlei oei sa ăn vă jê̆ 112.000 ŭnh hnam. Đĭ đăng tơring pơlei ‘nao đei trong hnam, chŏh jang sa ‘lơ̆ng hơ iă hlŏh kơ tơring pơlei so.

Atŭm hăm trong tơgŭm erĭh sa tơpôl đei tơlĕch hrơ̆p mĭnh ‘măng, tơdrong erĭh sa kơ kon pơlei roi năr roi ‘lơ̆ng hơ iă, sơđơ̆ng. Mă lei, hrei au oei đei hlŏh 16.000 ŭnh hnam kơdau oei glăi tim mă pơ prŏ ăn hơnĭh oei sơđơ̆ng, tŏk bŏk oei sa răh rap tơ̆ lơ tơring lơ̆m au găh lơ tơ̆ rim dêh char Tây Nguyên.

Vă jang kiơ̆ jơnei Tơdrong jang hơmet hơnĭh oei sa sơđơ̆ng kiơ̆ Tơdrong tơchơ̆t 590 đơ̆ng Thủ tướng tĕh đak, sơđơ̆ng jang keh đang trŭh sơnăm 2025 pơjing tơring oei sa sơđơ̆ng ăn vă jê̆ 64.300 ŭnh hnam, lơ̆m au đei 10.500 ŭnh hnam kon pơlei mơ̆t oei glăi, hop akom hlôi pơma dơnŭh, tơlĕch lơ trong jang. Lơ̆m au, lăng kơ jăp hlŏh ‘nŏh tơdrong jang kiơ̆ trong jang tơgŭm djru kơ tơdrong jang găh pơprŏ ăn tĕh oei, hnam oei, tĕh jang sa, tơmơ̆t jên jang pơm trong nơnăm au to; tơgŭm djru atŏk tơ iung chŏh jang sa, pơtho tơdrong jang păng tơchă đei tơdrong jang.