Iung pơma tơ̆ ‘măng pơgơ̆r, Tổng Bí thư, Kơdră chĕp pơgơ̆r Trung Quốc Tập Cận Bình tơbăt, đunh kơ ou 1 sơnăm atŭm hăm Tổng Bí thư, Kơdră chĕp pơgơ̆r teh đak Việt Nam Tô Lâm tơchơ̆t tơlĕch dơ̆ng tơdrong jang Iung yak kăl chă tơchĕng, hŏk pơhrăm, truh dang ei hơdruh tơdăm 2 teh đak hlôi đei lơ trong chă hŏk pơhrăm dih băl, tơgŭm djru dih băl. Ƀok ‘meh vă, hăm jơhngơ̆m đon tơnăp păng đei jơhngơ̆m, hơdruh tơdăm 2 teh đak hơnơ̆ng tơgoăt tơgoăl, iŏk jang hơnăp jang đei lơ tơdrong tơgop hloh dơ̆ng lơ̆m khei ‘năr 2 teh đak Trung Quốc păng Việt Nam vang yak tơ̆ trong gơh hơgei, atŭm dih băl tơ iung pơjing rim tơdrong jang pran kơtang găh tơplih ‘nao tơchăr, pơih trong jang hơdoi păng iŏk đei jơnei. Găh kơdih kou, Tổng Bí thư, Kơdră chĕp pơgơ̆r Teh đak Tô Lâm akhan, hơdruh tơdăm, jơhnơr mơlôh 2 teh đak jei gơh hưch hanh hơmanh bơnê păng yom kiơ̆ kơtang tơdrong tơgoăt tơgoăl dih băl “mĭnh păh bôl boăl, mĭnh păh ‘nhŏng oh” kơ ƀar Đảng păng Kon pơlei ƀar teh đak Việt Nam – Trung Quốc kơ yuơ Kơdră chĕp pơgơ̆r Teh đak Hồ Chí Minh hăm Kơdră chĕp pơgơ̆r teh đak Mao Trạch Đông atŭm hăm rim jơhnơr kĕch mang ƀar teh đak hlôi pơjing atŏk tơ iung. Ƀok hơpơi ‘meh vă jơhnơr mơlôh ƀar teh đak dăh tơ iung pơjing jơhngơ̆m pran chĭnh trĭ kơjăp iăp kơtang, hơrih sa trŏ lăp; atŏk kơtang hŏk pơhrăm dih băl, jang kiơ̆ ‘lơ̆ng tơdrong tơplih ‘nao tơchăr, pơm tơm tơngla khoa hŏk-kmăi kmŏk, pơm hơtŏk jơhngơ̆m pơm jŭk yuk trong hơlou năm iung jang, tơgop tơgăl ăn tơdrong atok tơ iung kơ teh đak păng tơgoăt tơgoăl ‘lơ̆ng hơ iă ƀar teh đak Việt Nam – Trung Quốc.

Jei lơ̆m ‘năr dơ̆ng năr 15/4, Tổng Bí thư, Kơdră chĕp pơgơ̆r teh đak  Tô Lâm hăm Tổng Bí thư, Kơdră chĕp pơgơ̆r teh đak Trung Quốc Tập Cận Bình hlôi vang năm Pơm lêh kĭ pơkăp hla bơar jang hơdoi gĭt kăl ƀar păh rim Hơnih jang tơm, hơnih jang, tơring kơ ƀar teh đak.