Yak hlŏh 5 ‘măng pơgơ̆r, tơdrong thi hlôi păr ang truh tơ̆ jơ̆p tơring, hăm ƀai thi sơnăm đơ̆ng rŏng lơ ƀiơ̆ kơ sơnăm hơdrol. Tơdrong thi ‘măng mă 1 đei 8.129 ƀai thi, truh dang ei hlôi tŏk truh 541.766 ƀai thi. Pơma pơtôch hop akŏm, ƀok Nguyễn Xuân Thắng, Kơdră chĕp kơ̆l Hnam hŏk Chinh trĭ teh đak Hồ Chí Minh, Kơdră vei lăng tơdrong thi chih ƀai chính luận găh vei lăng đon tơchĕng đơ̆ng Đảng pơma hơdăh:

Teh đak oei vă mât lơ̆m chăl jang tŏk ‘nao hăm bưng ai, anih dơ̆ng ‘nao, hăm tơdrong juăt ‘mêm kơ teh đak, đon hơpơi ‘mĕh jang tŏk, mât 1 ƀơ̆r đon, adrin, sơđơ̆ng jơhngâm jang tŏk, jơhngâm hưch hanh kơ hơdrĕch hơdrung roi tŏk păng hơtŏk iŏk yoa rim tơdrong ‘lơ̆ng. Vă pơm lăp hăm tơdrong yak mât lơ̆m chăl jang tŏk ‘nao, Hla ar chih kăl kơ Hop akŏm mă XIV kơ Đảng pơjao ăn Hnam hŏk chinh trĭ teh đak Hồ Chí Minh pơgơ̆r, jang hơdoi hăm Anih pơgơ̆r jang 35 Trung ương, Anih roi tơƀôh păng krao hơvơn kon pơlei Trung ương, Anih pơgơ̆r jang 35 tơ̆ dêh char tơplih ‘nao trong jang, trong pơgơ̆r tơdrong thi chih ƀai chính luận găh vei lăng đon tơchĕng đơ̆ng Đảng.