VOV4.Bahnar - Đơ̆ng rŏng 3 năr bơ̆ jang ‘lơ̆ng hơ iă, pơgê năr11/3, Pơm lêh hop akŏm Kơdră tang măt Drŏ kăn lơ̆m tĕh đak ‘măng mă 13 hlôi pơgơ̆r pơtôch. Pơm lêh hop akŏm hlôi pơdrơ̆ng kiơ̆ Tơdrong tơchơ̆t Pơm lêh hop akŏm 13 Khŭl Drŏ kăn Việt Nam hăm trong tơlĕch jang: Kiơ̆ yok rok jơ̆ng joăt joe, jơhngơ̆m đon tơgoăt tơgoăl, tơchăr hơ iă, iung jang vang mơ̆t hơdoi, jơhngơ̆m đon iung jang pơm tơngla kơ rim jơhnơr drŏ kăn; tơ iung pơjing Khul pran kơtang, hơdrin tơ iung pơjing Đảng, tơ iung pơjing trĭnh trĭ, vei lăng pơm tơngla păng đei iŏk yua trŏ ƀlep kơ drŏ kăn. Hơdrin trŭh sơnăm 2030, tơbăt 100 sơnăm năr pơjing Khŭl Drŏ kăn Việt Nam, sơkơ̆t hơdăh hơnĭh dơ̆ng dơnŏ anĭh yŭk trong hơlau lơ̆m tơring păng apŭng plĕnh tĕh; tơgop jang kiơ̆ jơnei trong tơlĕch jang atŏk tơ iung tĕh đak. Tơdrong tơchơ̆t jei tơlĕch trong iung jang rim sơnăm tơgŭm 33.500 ŭnh hnam đei drŏ kăn dơnŭh, yak hlŏh vă jê̆ dơnŭh; tơgŭm djru atŏk kơtang tơdrong jang gơ̆h hơgei ăn 17.000 ‘nu drŏ kăn ‘nŏh Tơngla hơnĭh mơdro sa, vei lăng Hơp tak xah, tơngla ŭnh hnam tĕch mơdro; trŭh đĭ jăl jang, chă pơrô̆, hơvơn tơgŭm djru pơjing ‘nao 350 Hơp tak xah đei bơngai drŏ kăn vang jang vei lăng. Rim sơnăm, mĭnh Khŭl drŏ kăn chă hơvơn, tơgŭm djru dơ̆ng 5 ŭnh hnam jang keh đang trong tơlĕch jang “Ŭnh hnam 5 ư̆h, 3 rơgŏh” dăh mă “ŭnh hnam 5 đei, 3 rơgŏh”...

Tơblơ̆ nơ̆r: Amazưt