Kiơ̆ kơ ‘nŏh, Khul kơdră teh đak oei tơlĕch 20 tơdrong vă tơroi ăn Quốc hội set hơlen, pơdrơ̆ng nơ̆r. Kơdră Quốc hội Trần Thanh Mẫn ăn tơbăt, đơ̆ng dang ei trŭh đĭ sơnăm, tơdrong jang đei tơlĕch hăm Quốc hội, Anih chĕp kơ̆l pơgơ̆r Quốc hội, Khul kơdră teh đak păng dôm anih jang đei ƀơm truh ‘nŏh tôch lơ. Mă loi jĭ dôm tơdrong chih pơjing luơ̆t kiơ̆ Hop akŏm tơlĕch Trong chih pơjing luơ̆t đơ̆ng Quốc hội jăl 16 păng tơdrong hơmet ăn dôm ‘măng hop akŏm truh âu kơnh.

Pơma hơdăh đơ̆ng dang ei truh đĭ sơnăm, hơdai hăm tơdrong chih pơjing luơ̆t oei đei lơ tơdrong jang gĭt kăl găh dăr lăng păng jang tơbôl nghị viện, lơ̆m noh đei pơgơ̆r hop akŏm găh luơ̆t păng Hop akŏm Quốc hội găh tơdrong jang dăr lăng sơnăm 2026 lơ̆m jăl khei mă III, Kơdră Quốc hội athei dôm anih jang hơlen năng kơjăp rim tơdrong, pơgơ̆r bơ̆ jang mă pran păng đei yoa.