Pơgê năr 8/10, tơ̆ Hơnih bơ̆ jang Trung ương Đảng, đơ̆ng rŏng hloh 2 năr bơ̆ jang tơnăp, tơpăt kơtang, Hop akŏm ‘măng mă 13 Khul kơdră chĕp pơgơ̆r Trung ương Đảng jăl XIII hlôi hop akŏm pơtôch. Iung pơma tơ̆ Hop akŏm, Tổng Bí thư Tô Lâm pơma hơdăh, Hop akŏm ‘măng mă 13 Khul kơdră chĕp pơgơ̆r Trung ương Đảng jăl XIII hlôi keh đang đĭ đăng dôm trong tơlĕch jang. Tơ̆ hop akŏm kơ rim tơdrong đei hơmet ăn tôch kơ ‘lơ̆ng, pơma dơnuh dih băl tơpăt, drơ̆ng mĭnh nơ̆r kơtang, lơ̆m ou đei lơ tơdrong đei ƀơm truh tơdrong jơnei kơ Hop akom tih kơdră tang măt lơ̆m teh đak ‘măng mă XIV kơ Đảng, truh trong tơlĕch ăn atŏk tơ iung tĕnh koăng, kơjăp ‘lơ̆ng, truh pơm hơtŏk tơdrong hơrih sa sơđơ̆ng dơ̆ng kơjăp kơ kon pơlei. Hop akŏm ‘măng mă ou hlôi pơma dơnuh tơpăt păng drơ̆ng mĭnh nơ̆r kơtang lơ trong jang kăl. Lơ̆m ou, Khul kơdră chĕp pơgơ̆r Trung ương pơdrơ̆ng kiơ̆ rim tơdrong tơchơ̆t pơtruh ăn Hop akom tih mă XIV kơ Đảng; drơ̆ng nơ̆r tơƀôh tơbăt khul kơdră bơ̆ jang lơ̆m Khul kơdră chĕp pơgơ̆r Trung ương păng Hơnih bơ̆ jang Dăr lăng Trung ương jăl XIV; ăn tơgop nơ̆r găh jơ ‘năr, tơdrong jang, tơdrong pơgơ̆r, tơdrong tơchơ̆t bơ̆ jang, tơdrong tơchơ̆t pôk rơih kơ Hop akŏm tih Đảng lơ̆m teh đak ‘măng mă XIV hăm trong sơđơ̆ng ƀlep tơdrong pơkăp, tơplih ‘nao, khoa hŏk, jơnei, trŏ ƀlep tơpă.