Sơnăm tơmang lăng teh đak 2022 hlôi đei hloh 210 tơdrong joh ayŏ, tơmang lăng pơgơ̆r tơ̆ jơ̆p lơ̆m teh đak, lơ̆m noh, hơdrô̆ Quảng Nam pơgơ̆r 73 tơdrong jang, tơgop păr ang hơnăp jang, đei yua đơ̆ng tơmang lăng hăm mŭk drăm teh đak. Mă đơ̆ng tơmoi apŭng plĕnh teh truh tơ̆ Việt Nam tam mă iŏk đei nhen ‘meh vă, mă lei sơnăm 2022, Việt Nam hlôi sơng 3,5 triệu ‘nu tơmoi. Akŏp kơsô̆ tơmoi lơ̆m teh đak iŏk pơhlom đei hloh 101,3 triệu ‘nu. Akŏp iŏk đei đơ̆ng tơmang lăng jô̆ pơhlom đei 495 rơbâu ti hlak jên.

Tơdrong jang joh ayŏ kơdŏ soang tơ̆ lêh pơtôch Sơnăm tơmang lăng teh đak - Quảng Nam 2022 đei 90 pơnĭt, tơroi nơ̆r pơma Quảng Nam - tơring teh đei lơ tơdrong joh ayŏ joăt joe, jơhnơr arih kach mang, tơplih ‘nao... hăm lơ tơmam ‘lơ̆ng, tơdrong hiôk đei kơdih, joh ayŏ vă hơtŏk tơiung tơmang lăng. Lêh pơtôch ‘noh jĭ tơdrong jang pơtôch Sơnăm tơmang lăng teh đak vă pơtôch, hơlen lăng iŏk yua pơgơ̆r Sơnăm tơmang lăng teh đak - Quảng Nam 2022; hơdai hăm, pơjao Hla kơ iŏk pơgơ̆r Sơnăm tơmang lăng teh đak 2023 ăn dêh char Bình Thuận hăm hơnăn “Bình Thuận - Akŏm rơgoh ‘lơ̆ng”.