Pơgê năr 14/12, tơ̆ Anih Hŏk hôp kơ teh đak (Hà Nội), Hop akŏm bơngai tang măt jâ̆p teh đak ăn Đoan hơdruh tơdăm Cộng sản Hồ Chí Minh 'măng mă 12, jăl jang 2022 – 2027 hăm hơnăn  "Hơpơi 'moih – Dăp đon – Tơguăt tơguăl – Đon kơchăng – Gơh rơgei" pơtơm kăp gĭt hăm tơdrong vang akŏm đơ̆ng 980 'nu tang măt noh đe kang ƀô̆, đoan viên gơh rơgei tang măt ăn hloh 22 rơtuh đoan viên, hơdruh tơdăm Việt Nam lơ̆m păng 'nguaih kơ teh đak.

Hop akŏm jing tơdrong chĭn trĭ kăp gĭt kơ xơnăm mơlôh Việt Nam, pơm gru kơnăl kơ 'nôh, đei jơnei kăp gĭt kơ anih jang Đoan păng tơdrong jang kơ đe hơ ioh lơ̆m 5 xơnăm kơ âu.  Hop akŏm đei xơnong kăp gĭt tơdrong pơm kiơ̆ Tơchơ̆t Hop akŏm jâ̆p teh đak kơ Đoan hơdruh tơdăm CS Hồ Chí Minh 'măng mă 11, jăl jang 2022-2027; xơkơ̆t tơchơ̆t, xơnong jang păng trong pơm jang đoan păng tơdrong jang hơdruh tơdăm hơ-ioh iĕ jăl jang 2022-2027. Hop akŏm gô pôk Ƀan châ̆p hanh T.Ư Đoan 'măng mă 12, jăl jang 2022-2027; hơmet tơplih Tơchơ̆t Đoan păng hơlen Tơchơ̆t Đoan đei hơmet tơplih.