'Măng hop akŏm gô vă pơgơ̆r lơ̆m 2 'măng. 'Măng mă 1: ah kơsơ̆ năr 1 păng năr 2/10. 'Măng mă 2: ah kơsơ̆ năr 10/10.  Tơ̆ 'Măng hop akŏm ou, Hơnih jang Kơpal kơ Kuô̆k hô̆i tơgop nơ̆r ăn dôm tơdrong chih akŏm: Luơ̆t Groi teh (hơmet tơplih); Luơ̆t Hnam oei (hơmet tơplih); Luơ̆t Tĕch răt teh hnam oei (hơmet tơplih); Luơ̆t gah hla bar pơkăp khôi luơ̆t; Luơ̆t Jên mong kơ teh đak (hơgrop jing minh).

Gah tơdrong jang hơlen lăng, Hơnih jang Kơpal Kuô̆k hô̆i tơgop nơ̆r gah Chih akŏm tơbang kơ Jơnŭm pơgơ̆r teh đak gah tơdrong pơm kiơ̆ Tơchơ̆t kơsô̆ 206/2025 đơ̆ng Kuô̆k hô̆i gah tơchơ̆t kăp gĭt sek tơlang tơnap tap, tơhlăk tăk kơyuơ pơkăp đơ̆ng khôi luơ̆t; hla bar chih tơroi đơ̆ng Jơnŭm pơgơ̆r teh đak gah tơdrong jang đei kiơ̆ Tơchơ̆t jang hơtŏk mŭk drăm – tơpôl sơnăm 2026, chih hơmŏ Tơchơ̆t jang hơtŏk mŭk drăm – tơpôl sơnăm 2027; păng vang tơgop nơ̆r gah chih akŏm hla bar tơbang nơ̆r tơgop pơtruh đơ̆ng kon pơlei tah hla pơtruh ăn 'Măng hop akŏm mă 2, Kuô̆k hô̆i jăl 16.