VOV4.Bahnar – Năr  4/8, tơ̆ pơlei tơm Hồ Chí Minh pơtơm ‘Măng pơlong hơkŏp Pơre nơ̆r jâ̆p teh đak ‘măng mă 15 xơnăm 2022. Ƀok Đồng Mạnh Hùng, Kơdră Ƀan thư kĭ Chih akŏm, Tổng Thư kĭ Pơlong pơre nơ̆r  jâ̆p teh đak ‘măng 15 ăn tơbăt, âu jing ‘măng pơlong đei lơ tơring vang akŏm hloh, đei 63 dêh char pơlei tơm păng lơ anih jang kơ Rađiô nơ̆r pơma Việt Nam. ‘Nâu duh jing xơnăm đei lơ tak phẩm vang pơlong hloh, hăm hloh 500 tak phẩm. Dôm tak phâm đei rơih pơlong ăh ‘măng hơkŏp đei xơkơ̆t rơgei, hlôi đei tơbang găh tơdrong erih dang ei. Hơdăh noh dôm tơdrong tơrĕk truh hơ ‘nhăk Tơchơ̆t Hop akŏm Đảng jâ̆p teh đak ‘măng 13 lơ̆m tơdrong erih, tơdrong tơjră pơrang jĭ COVID-19, dôm tơdrong hơmet păng hơtŏk mŭk drăm. Mă kăl đei lơ tak phâm tơroi găh um ai jang tơnăp tơdrong jang ‘lơ̆ng. ‘Nâu jing dôm tơdrong đei jơnei mă blŭng hăm Pơlong pơre nơ̆r jâ̆p teh đak ‘măng mă âu. Anih ‘nao lơ̆m tơdrong Pơlong Pơre nơ̆r xơnăm âu noh Jơnŭm pơgơ̆r pơkăp pơgơ̆r pơlong păng pôk hơpăh ăn ƀơ̆r pơre nơ̆r ‘lơ̆ng Giọng Vàng, vă ƀôh băt păng pôk pơ ư hăm dôm bơngai jang pơre nơ̆r/ bơngai đei ƀơ̆r pơre tơdrong tơroi ‘lơ̆ng rơgei; pôk hơpăh ăn 2 kơloăi: Kih thuơ̆t chih akŏm pơjing tơdrong tơroi pơre nơ̆r rơgei păng tơdrong Iŏk yua trong jang ‘nao kiơ̆ pơkăp kơsô̆.

- Lơ̆m tơdrong pơgơ̆r Pơlong rapor lơ̆m tĕh đak ‘măng mă XV, tơ̆ Radiô Nơ̆r pơma Kon pơlei pơlei tơm Hồ Chí Minh tŏk bŏk pơgơ̆r pơdăh “Tơdrong iŏk đei jơnei mŭk drăm tơpôl pơlei tơm Hồ Chí Minh” păng “Tơdrong jơnei atŏk tơ iung kơ Radiô Nơ̆r pơma Kon pơlei pơlei tơm”.

Pơdă “Tơdrong iŏk đei jơnei mŭk drăm tơpôl pơlei tơm Hồ Chí Minh

‘Măng pơdăh “Pơlei tơm Hồ Chí Minh hơbĕch hơbal-atŏk tơ iung-Phăl rơhăo” pơdă 60 hlak rup atŭm hăm lơ trong jang mŭk drăm ‘lơ̆ng hơ iă, tơƀô̆h tơbăt rim tơdrong jang atŏk tơ iung mŭk drăm, chinh trĭ, jŏh ayŏ, tơpôl kơ pơlei tơm dôm sơnăm tơjê̆ au. ‘Măng pơdă Tơdrong jơnei Atŏk tơ iung kơ Radiô Nơ̆r pơma Kon pơlei pơlei tơm Hồ Chí Minh” tơbăt ăn kon pơlei dôm hla bơar, rup, tơmam drăm gĭt kăl lơ̆m khei ‘năr tơ iung pơjing păng atŏk tơ iung kơ Radiô Nơ̆r pơma Kon pơlei pơlei tơm Hồ Chí Minh lơ̆m hlŏh 40 sơnăm au ki. Lơ̆m au, đei rim tơdrong rapor tơbăt hơdăh tơdrong gĭt kăl kơ radiô Nơ̆r pơma Kon pơlei pơlei tơm Hồ Chí Minh nhen: Tơdrong rapor jŏh hơri ‘lơ̆ng rŏ, Tơdrong rapor jŏh hơri kai lương Hơ ie ƀa đum; ‘Măng pơlong hao tang vang Nam Kỳ Khởi Nghĩa,… Tơ̆ lơ̆m pơdă au, oei đei lơ tơmam drăm, kmăi kmŏk pơ yua ăn bơ̆ jang kơ rim bơngai jang chĭh kơtơ̆ng ang, bơngai chĭh akŏm kơ Radiô Nơ̆r pơma Kon pơlei (VOH) lơ̆m rim chăl sơnăm.

Tơblơ̆ nơ̆r: Lan - Amazưt