Ƀlep lơ̆m ‘măng năm Hop akŏm kơdră kơpal ASEAN ‘măng mă 46, kơsơ̆ năr 26/5, Thủ tướng Teh đak Phạm Minh Chính hlôi đei tơƀơ̆p Thủ tướng Lào Xỏn-xay Xi-phăn-đon. Ƀar ‘nu Thủ tướng drơ̆ng mĭnh nơ̆r pơtrŭt kơtang atŏk tơ iung 2 tơdrong vă jang tơƀưh trong gre gĭt kăl ‘noh trong gre rĕnh Hà Nội - Viêng-chăn, trong gre treng Viêng-chăn - Vũng Áng. Tơ̆ tơƀơ̆p, Thủ tướng Lào Xỏn-xay Xi-phăn-đon bơnê kơtang hăm tơdrong tơgŭm djru ‘lơ̆ng hơ iă đơ̆ng Việt Nam ăn kơ Lào lơ̆m tơdrong iung tơblăh pơm rơngei hơdrĕch hơdrung sơ̆ adoi nhen atŏk tơ iung teh đak hrei ou; sơkơ̆t hơdăh, Khul kơdră Lào gô iung jang hơdoi kơjăp hăm Khul kơdră Việt Nam tơlĕch jang jơnei rim tơdrong vă jang hơdoi kăl kơ ƀar teh đak, tơbăt ăn dôm năr lêh gĭt kăl kơ ƀar Đảng, ƀar Teh đak lơ̆m sơnăm 2025. Ƀar ‘nu Thủ tướng drơ̆ng mĭnh nơ̆r iung jang hơdoi kơjăp tơlĕch jang kiơ̆ jơnei rim tơdrong drơ̆ng mĭnh nơ̆r khul kơdră kơpal ƀar teh đak; iung jang hơdoi vei lăng sơđơ̆ng teh đak, sơđơ̆ng tơpôl; atŏk kơtang jang hơdoi vei lăng sơđơ̆ng dơ̆ng kơjăp sơlam teh đak; atŏk kơtang tơgoăt dih băl tơdrong jang mŭk drăm găh trong nơnăm, ŭnh hơyuh, viên thông păng tơmang pơhiơ̆, lơ̆m ou hơnơ̆ng pơtrŭt kơtang tơlĕch jang 2 tơdrong vă jang tơƀưh trong nơnăm gĭt kăl ‘noh trong gre rĕnh Hà Nội - Viêng-chăn, trong gre treng Viêng-chăn - Vũng Áng.