‘Nao âu, tơ̆ pơlei tơm Đà Lạt, Trung ương Đoàn hơdruh tơdăm Cộng sản Hồ Chí Minh jang hơdai hăm Anih jang Đảng dêh char, Anih vei lăng kon pơlei dêh char Lâm Đồng pơgơ̆r Lêh pơjao tơmam hơpăh Lương Định Của ‘măng mă 17 păng pơjao tơmam hơpăh pơ tôch ‘Măng pơlong Tơdrong jang tơ iung tơdrong jang sa hơdruh tơdăm tơring tơrang sơnăm 2022. Hloh 17 sơnăm pơgơ̆r, tơmam hơpăh Lương Định Của hlôi pôk pơ ư 2.050 “bơngai jang chŭn mir gơh hơgei”. Păng sơnăm ‘nâu, tơmam hơpăh đei pơjao ăn kơ 32 ‘nu hơdruh tơdăm hơgei hăm đon hơdrin pơm pơdrŏng păng iŏk đei jơnei ‘lơ̆ng lơ̆m teh đak.

Pơma tơ̆ jơ pơm lêh, ƀok Trần Tuấn Anh, Bơngai jang lơ̆m Anih tơm Chĭnh trĭ, Kơdră Anih anih jang mŭk drăm Trung ương hlôi tơ ƀôh đon chơt hơ iă găh tơdrong đei ƀôh roi ‘năr roi lơ anih jang mơdro sa, hơp tak xăh, bơ ngai mơ lôh jang pơgar să, dôm tơdrong jang hơdai hơ tŏk tơiung mŭk drăm bơ̆ jang lơ̆m choh jang sa, tơring tơrang tơtĕnh yak tŏk jing tơdrong jang ‘lơ̆ng tơ̆ rim tơring păng apŭng plĕnh teh. Lơ̆m dôm hơdruh tơ dăm iŏk tơmam hơpăh Lương Định Của sơnăm 2022, lơ buăl mơ lôh đei iŏk yua hloh 30 ti hlak jên păng đei buăl iŏk yua đei 706 ti hla jên, iŏk yua kơ ti hlak jên rim sơ năm. Mă loi ‘noh, lơ buăl hơdruh tơdăm kon kông tơ̆ tơring oei mơmat tat mă lei hăm jơhngơ̆m đon hơdrin hlôi yak hloh pơm pơdrŏng trŏ ƀlep, jing dôm bơngai mơ lôh pơ drŏng tôch kơ dêh. ‘Nâu jĭ dôm bơngai tôch kơ hơdrin dôm tơdrong jang hơdruh tơdăm pơjei băl pơm tơlĕch, tĕch mơdro hơgei, sơnăm mơ lôh vang tơgŭm pơjing tơring tơrang ‘nao tơ̆ tơring. Hăm dôm tơdrong jang hơdăh ‘lơ̆ng hlôi pơ trŭt jơhnơr mơlôh tơring tơrang chhôk hơ iă pơ jei băl jang sa, pơm tơlĕch yak tŏk pơm pơdrŏng. Ƀok Trần Tuấn Anh tơ roi:

“Bơ̆n pơgơ̆r pôk pơ ư hơnăn dôm bơngai jang chŭn mir mơ lôh hơ gei hloh, đe sư jing dôm bơngai ‘lơ̆ng hloh lơ̆m kơ sô̆ kơ triệu hơdruh tơdăm hơgei tŏk bŏk măng năr tơgop jơ hngơ̆m mơ lôh, đon gơh hơgei, đon nuih, tơdrong pơnam ăn tơdrong jang hơtŏk tơiung choh jang sa, pơjing tơring tơrang ‘nao. Ĭnh lui ngeh akhan, hăm tơdrong chhôk ‘nă, pôk pơ ư hơ năn đơ̆ng dôm buăl mơ lôh đei iŏk tơmam hơpăh năr ‘nâu, gô hơnơ̆ng đei păr ang truh lơ lap đoàn viên, hơdruh tơdăm tơ̆ rim tơring, anih jang, tơgop gĭt kăl pơtrŭt dôm tơdrong jang pơjei băl pơm tơlĕch tĕch mơdro hơgei, pơjing tơring tơrang ‘nao đei lơ yak năm pran kơtang hloh tơ̆ hơnăp kơnh.”

Ƀok Trần Tuấn Anh kŭm athei, rim kơdră Đảng, khŭl kơdră chĕp kơ̆l, rim anih tơm, anih jang kăl kơ bơngơ̆t hloh dơ̆ng truh hơdruh tơdăm păng tơdrong jang hơdruh tơdăm, tơgŭm păng pơm tơdrong hiôk ‘lơ̆ng hloh vă sơnăm mơlôh lơ̆m teh đak păng anih jang Đoàn pơma atŭm, hơdruh tơ dăm tơring tơrang pơma hơdrô̆, plang jơhngơ̆m, đon hơgei, iung jang vang hơtŏk tơiung mŭk drăm – tơ pôl, jang kiơ̆ jơnei tơdrong jang kơmăy kơmŏk ‘nao, teh đak ‘lơ̆ng rŏ păng choh jang sa, tơring tơrang.

Tơ̆ jơ pơm lêh, 32 ‘nu hơdruh tơ dăm hơ gei đei set rơih đơ̆ng 81 hồ sơ kơ 45 anih jang đoàn dêh char, pơlei tơm lơ̆m teh đak đei pơjao tơmam hơpăh Lương Định Của sơnăm 2022. Khŭl pơgơ̆r hlôi pơjao tơmam hơpăh ăn kơ 9 tơdrong jang gơh hơgei hloh (‘noh đei 1 jơnei mônh, 2 jơnei ƀar, 3 jơnei pêng păng păng 3 jơnei pơ chhơp jơhngơ̆m), lơ̆m akŏp kơ sô̆ 31 tơdrong jang vang pơlong ‘măng pơtôch tơdrong pơlong tơdrong jang hơdruh tơdăm tơiung tơdrong jang sa tơring tơrang sơnăm 2022.

Kŭm ƀơm truh tơdrong tơiung tơdrong choh jang sa ăn hơdruh tơdăm tơring tơrang, lơ̆m giĕng âu ki, Khŭl vei lăng hơdruh tơdăm Việt Nam dêh char Dak Lak hlôi pơgơ̆r tơdrong jang pơhrăm hơtŏk ‘lơ̆ng đon hlôh vao, tơmơ̆t yua khoa hŏk kơmăy kơmŏk lơ̆m choh jang sa păng tĕch mơdro tơmam ‘măn tăn hơdruh tơdăm kon kông. Vang hŏk lăm pơhrăm đei hloh 100 ‘nu hơdruh tơdăm kon kông tŏk bŏk pơm tơlĕch, tĕch mơdro lơ̆m tơdrong jang choh jang sa păng kang ƀô̆ Khŭl vei lăng hơdruh tơdăm lơ̆m tơring kon pơlei oei jơ̆p lơ̆m dêh char.

Dôm bơngai hŏk đei pơhrăm dôm tơdrong hlôh vao găh tơdrong kơjă, jang hơdai, dôm tơdrong jang găh tơmơ̆t yua kơ jă lơ̆m pơm tơlĕch păng tĕch tơmam, tơdrong tơ ƀôh tơmam păng tĕch tơmam. Pơm grŭp găh kơ jă, pơm trang mạng điện tử păng tĕch tơmam trực tuyến. ‘Nhŏng Y Lê Pas Tơr, Kơdră Khŭl vei lăng hơdruh tơdăm Việt Nam dêh char Dak Lak tơbăt, ‘nâu jĭ tơdrong jang kiơ̆ tơdrong jang đơ̆ng Trung ương Khŭl vei lăng hơdruh tơdăm Việt Nam vă tơgŭm hơdruh tơdăm kon kông lơ̆m dêh char đei dơ̆ng hlôh vao, gơh jang, tơdrong hơgei đơ̆ng khoa hŏk ki thuơ̆t lơ̆m pơm tơlĕch choh jang sa, tơgop hơtŏk tơiung mŭk drăm tơpôl.

“Lơ̆m khei ‘năr pơm tơlĕch choh jang sa đơ̆ng hơdruh tơdăm lơ̆m dêh char Dak Lak đei tơdrong jang kiơ̆ khoa hŏk kơmăy kơmŏk kŭm nhen tơmơ̆t yua khoa hŏk kơmăy kơmŏk lơ̆m pơm tơlĕch oei tam gan lơ. Tơdrong pơtho tơdrong hlôh vao ƀơm truh tơmơ̆t yua dôm tơdrong gơh hơgei khoa hŏk kơmăy kơmŏk păng lơ̆m pơm tơlĕch ăn hơdruh tơdăm ‘noh jĭ 1 hơnap jang kăl. Anih jang Đoàn, khŭl vang jang hăm khŭl jang găh tơiung tơdrong jang sa, mă loi ‘noh jĭ tơdrong yak hơdai hăm hơdruh tơdăm lơ̆m tơiung pơ jing tơdrong jang sa”.