Hop akŏm jĭ ‘măng vă răp mơ̆ng anih jang mơdro sa 2 teh đak vang tơroi dôm tơdrong mơmat tat, tơhlăk tơhlĭn, tơroi dôm tơdrong ‘meh vă hăm anih jang vei lăng teh đak păng tơroi tơdrong hlôh vao jơnei lơ̆m bơ̆ jang tĕch mơdro đơ̆ng kơdih. Hơdai hăm, lăng ƀôh, hơlen lăng dôm jơnei iŏk đei, dôm tơdrong tam mă ‘lơ̆ng, oei đei lơ̆m bơ̆ jang mơdro sa, jang hơdai ŭnh hơyuh đơ̆ng Việt Nam - Lào lơ̆m khei ‘năr âu ki kŭm nhen dôm tơdrong tơhlăk tơhlĭn găh trong jang tơgŭm, hla ar bơ̆ jang kăl kơ hơmet pơ ‘lơ̆ng.

Tơ̆ hop akŏm, 2 păh oei vang hơdai băl tơ chă dôm trong jang vă pơm dơ̆ng tơdrong hơiă vang jang đơ̆ng anih jang mơdro sa 2 teh đak lơ̆m jang hơdai mŭk drăm, tơmơ̆t jên jang, mơdro sa păng lơ̆m dôm tơdrong jang hơdăh nhen: anih jang mơdro sa, tơdrong jang tĕch mơdro le, trong vă hơtŏk tơiung kơmăy kơmŏk pơm tơlĕch vă yak truh tơdrong hơgăt jên tĕch tơmam đơ̆ng 2 teh đak jăh iŏk đei 2 ti USD tơ̆ hơnăp kơnh.