Hăm minh pôm điê̆n thoăi thŏng minh đei tơguăt hăm internet, adrô̆ tơ-oei tơ̆ hnam, ƀok Y Kơn Niê (aê Uyên), tơ̆ pơlei Ea Đun, xăh Ea Kênh, apŭng Krông Pach duh ƀônh ƀŏ kla jên yua unh hơyuh, tơmơ̆t jên card điê̆n thoăi. Ƀok Y Kơn tơroi, đơ̆ng mă trong jang “Tơring kon pơlei kŏng ngê̆ sô̆” đei tơlĕch tơ̆ pơlei, ƀok păng lơ kon pơlei hlôi băt hơdăh kŏng ngê̆  sô̆ noh thoi yơ păng dar deh iŏk yua kŏng ngê̆ sô̆ lơ̆m dôm tơdrong jang rim năr. Ƀok Y Kơn Niê tơroi: “Inh ƀôh đei lơ tơdrong ƀônh, nhen adrol ki noh jên unh hơyuh inh athei năm truh tơ̆ anih iŏk jên vă kla, mă lei dang ei tơplih kơsô̆ mă tơ-oei tơ̆ hnam yua điê̆n thoăi đĕch. Thoi noh ƀônh hiôk dêh, da ƀiơ̆ chă vih vơ̆t, gơh kla jên lai yơ duh bưh, ưh đei năm truh tơ̆ xăh. Kai đăt  app lơ̆m điê̆n thoăi noh adoi ƀônh mơ̆n”.

Oei hăm Y Blen Niê, Ƀĭ thư chi đoan pơlei Ea Đun, gơnơm đei kŏng ngê̆ sô̆, tơdrong tơlĕch pơm jang dôm tơdrong jang đoan dăh mă tơroi tơbăt ăn đe đoan viên hơdruh tơdăm adoi ƀônh hloh lơ̆m tơdrong chă akŏm tơroi tơbăt păng pơtrruh nơ̆r tenh hloh. Phŏ, gơnơm đei kŏng ngê̆ sô̆ hlôi tơgŭm ưh gan huach jơ, ƀônh hiôk ƀơ̆t đei dôm tơdrong tơroi kăl tơtenh vă pơm jang. Y Blen Niê tơroi: “Inh akŏm khul păng chih tơroi lơ̆m Zalo, messenger, Facebook păng yua dôm grŭp âu vă chih tơroi ăn đe đoan viên chi đoan pơlei Ea Đun băt găh jơ ‘năr akŏm hŏk hôp. Ƀôh hăp hiôk păng pơyua tơpă, phŏ inh oei minh anih đĕch mă adoi gơh chô̆ pơdjoi hopa kŏm trư̆k twên kiơ̆ đơ̆ng Zalo, Facebook”.

Pơlei Ea Đun dang ei đei hloh 300 unh hnam hăm jê̆ 1.500 măt bơngai kơ 7 hơdrung bơngai erih jang xa, lơ̆m noh kon kông tơ̆ tơring đei hloh tong anê̆. Kiơ̆ kơ ƀok Nguyễn Khắc Hiệp, Ƀĭ thư chi ƀô̆ adoi jang Kơdră pơlei Ea Đun, gơnơm tơplih hơdrĕch ‘long pơtăm đei yua lơ, tơdrong iŏk yua hăm rim bơngai jang ăh xơnăm âu ki đei 55 trĭu hlj lơ̆m 1 xơnăm. Mă lơ noh kon pơlei đơ̆ng 16 xơnăm tŏk tơ̆ kơpal adoi yua điê̆nt hoăi thŏng minh đei chô̆ hăm mạng 4G, yua mạng wifi.

Đơ̆ng khei 12 xơnăm 2022, pơlei Ea Đun hlôi tơlĕch pơm kiơ̆ “Tơring kon pơlei kŏng ngê̆ sô̆”, pơjing khul “kŏng ngê̆ sô̆ pơlei pơla” hăm 5 ‘nu jang tơm kơyươ Kơdră pơlei pơm kơdră. Đơ̆ng ‘nao iŏk jang, khul Kŏng ngê̆ sô̆ pơlei pơla hlôi hăt hot iŏk jang tơroi tơbăt găh dôm ư̆ng yŭng kŏng ngê̆ sô̆ truh rim bơngai, rim unh hnam hăm tơdrong tơm noh iŏk yua pơm jang trư̆k twê̆n, chă kla jên âu to mă ưh kơ kăl yua jên măt, phân mêm baoh hiêm y tê̆, ƀaoh hiem xăh hô̆i, trong chă hơlen lăng đon bơnôh đơ̆ng kon pơlei hăm kang ƀô̆, bơngai jang tơ̆ xăh kiơ̆ ư̆ng yŭng Zalo, pơtho yua Internet xơđơ̆ng... Anih jang tơguăt hăm pơlei adoi axong gŏi kươk wifi ưh kơ iŏk jên ăn kon pơlei vă hơvơn kon pơlei tơrĕk iŏk yua kŏng ngê̆ sô̆, hơtŏk iŏk yua dôm tơdrong pơkăp pơm jang kiơ̆ trư̆k twê̆n.

Ƀok Nguyễn Khắc Hiệp akhan, hăm trong jang đơ̆ng khul kŏng ngê̆ sô̆ lơ̆m pơlei pơla noh “truh kơleng tơteng rim hnam” vă tơroi găh tơplih kơsô̆, kon pơlei tơ̆ pơlei Ea Đun gô dar deh tơplih trong juăt păng hơtŏk tơdrong yua kŏng ngê̆ sô̆:  Kiơ̆ dôm ‘măng hŏk hôp kon pơlei adoi nhen dôm tơdrong akŏm et xa xô̆, hop akŏm noh yak hadoi hăm kon pơlei, chă tơroi tơbăt, hơvơn kon pơlei pơm kiơ̆ kŏng ngê̆ sô̆. Noh âu jing tơchơ̆t mă mônh noh tơchơ̆t đơ̆ng Đảng păng mă 2 noh ‘măn pơyua ăn kơdih rim kon pơlei lơ̆m tơdrong tĕch răt kla jên adoi nhen lơ̆m chă iŏk yua kŏng ngê̆ sô̆ lơ̆m tơdrong erih kon pơlei. Kơdih po unh noh nhen lĕ yua Internet lang lap, tơroi lơ̆m aloa rapor noh minh păh đĕch mă lei tơroi lơ̆m dôm ư̆ng yŭng păng nhôn pơjing trong Zalo kơ khul kŏng ngê̆ lơ̆m pơlei pơla. Rim ‘măng mih ma duch nă iŏk yua noh mơ̆t lơ̆m dôm mã pơkăp QR Code khul kŏng ngê̆ pơlei pơla noh kơtơ̆ng ang đei tơrĕk truh kon pơlei adoi băt ngăl.

Yă Trần Thị Vân, Phŏ kơdră Anih vei lăng kon pơlei xăh Ea Kênh, apŭng Krông Pach ăn tơbăt, pơm kiơ̆ tơdrong pơlong  “Tơplih kơsô̆ jăl xơnăm 2022 – 2025” kơyươ Anih vei lăng kon pơlei apŭng Krông Pach tơlĕch, xăh hơvơn tôm anih jang chĭnh trĭ atŭm hăm dôm anih jang mŭk drăm păng tôm kon pơlei vang jang vă atŭm băl pơxă tơdrong jang truh tôm thôn, pơlei, kueng kơphô̆. Đơ̆ng trong jang mă blŭng kơyươ Anih vei lăng kon pơlei apŭng Krông pach pơjing tơ̆ thôn Tân Đông (xăh Ea Kênh), truh dang ei, xăh hlôi tơlĕch truh pơlei Ea Đun, jing pơlei kăp gĭt hăm lơ kon pơlei kon kông erih jang xa, tơdrong hŏk pơhrrăm oei kơđeh, tơdrong hlôh vao lơ̆m kon pơlei ưh đei hơtŏ băl. Mă blŭng ƀôh kon pơlei hăt hot pơm kiơ̆, hơtŏk chă yua tơplih kơsô̆ lơ̆m tĕch pơdro, kla jên:  Lơ̆m khei năr truh vă iŏk yua tơnăp xơnong jang kơ khul kŏng ngê̆ sô̆ lơ̆m tơpôl noh xăh adoi pơjing tơdrong jang tôm thôn, pơlei lơ̆m tơring gô tơbang tơring kon pơlei kŏng ngê̆ sô̆ âu, vă ăn kon pơlei tơrĕk đei dôm ư̆ng yŭng tơrĕk truh kŏng ngê̆ sô̆ nhen kla jên ưh đei yua jên măt, kla jên trư̆k twên hăm jên yua unh hơyuh, jên thuê̆ đang kơ noh dôm tơdrong nai.

Đơ̆ng dôm tơdrong đei jơnei mă blŭng, trong jang “Tơring kon pơlei kŏng ngê̆ sô̆” hlôi đei pơxă truh lơ thôn, pơlei tơ̆ apŭng Krông Pach, hăm hloh 250 khul kŏng ngê̆ sô̆ tơpôl đei tơ-iung pơjing, jâ̆p thôn, pơlei, kueng kơphô̆. Dôm khul jang âu đei tơdrong vang jang đơ̆ng lơ khul bơngai nhen jơnŭm vei lăng pơlei pơla, jơnŭm jang Măt trâ̆n, bơngai jang lơ̆m jơnŭm jang tơpôl, thâi kô, kŏng ang, đe hơdruh tơdăm... Kiơ̆ đơ̆ng noh tơgop hơ-‘nhăk tơplih kơsô̆ tơmơ̆t lơ̆m tơdrong erih đơ̆ng tơring ƀônh truh tơring ataih yaih, tơring tơnap tap.