VOV4.Bahnar - ‘Năr 11/3, tơ̆ Hà Nội, Anih tơm vei lăng Công an pơ gơ̆r tơ băt 25 sơ năm Năr Khul linh kanh sat dăr hơ len găh ma túy (12/3/2022) păng sơng iŏk Mê đai tơ blăh jơ nei dơ̆ng mă 1. Hlŏh 20 sơ năm, rim anih jang kơ Khul linh Kanh sat dăr hơ len tơ drong yoch ma túy jang tŏk roi pran păng jang roi gơ̆h hơ gei. Iŏk đơ̆ng sơ năm 1997 truh dang ei, khul linh kanh sat dăr hơ len tơ drong yoch ma túy lơ̆m tĕh đak chă ƀôh, rôp vei hlŏh 290 rơ bâu tơ drong glăi, hlŏh 460 rơ bâu ‘nu bơ ngai yoch, thu iŏk hlŏh 5 tân sike, vă jê̆ 82 tân heroin, vă jê̆ 22 tân ma túy hrou hrĕk; lơ tơ mam đei kơ jă truh rơ bâu ti hlak jên nôp ăn tĕh đak…

Pơ ma lơ̆m jơ pơm lêh, Phó Thủ tướng Vũ Đức Đam pơ ma hơ dăh, tơ drong jang tang găn ma túy ưh lăp tơ drong jang hơ drô̆ đơ̆ng khul linh kanh sat dăr hơ len tơ drong yoch ma túy đĕch, mă athei đei tơ drong vang jang đơ̆ng đĭ đăng khul linh, anih jang kơ pal đei ƀơm truh păng rim anih jang chinh trĭ hai. Phó Thủ tướng athei, tơ̆ hơ năp kơnh, khul linh kanh sat dăr hơ len tơ drong yoch ma túy lơ̆m tĕh đak akŏm jơ hngâm jang ‘lơ̆ng tơ drong roi tơ ƀôh ăn anih jang đảng, khul kơ dră tơ ring hơ tŏk tơ drong chĕp kơ̆l pơ gơ̆r, akŏm jơ hngâm pran đơ̆ng rim anih jang chinh trĭ păng đĭ đăng kon pơ lei vang bơ̆ jang tang găn ma túy.

Dơ̆ng: Tơ blơ̆