VOV4.Bahnar - Kơ sơ̆ 8/02, Phó Thủ tướng Vũ Đức Đam, Phŏ Kơ dră Anih pơ gơ̆r jang kơ tĕh đak găh tang găn jĭ COVID-19 pơ gơ̆r hop akŏm hăm kơ dră chĕp kơ̆l Anih tơm vei lăng jang pơ gang, dôm bơ ngai juăt jang pơ gang, kơ dră chĕp kơ̆l 1,2 tơ ring găh trong tơ jră mưh đei bơ ngai jĭ F0 tơ̆ hnam trưng.

Kiơ̆ kơ ‘nŏh, dôm bơ ngai juăt jang akhan tơ drong tơm vă tang găn ‘lơ̆ng jĭ, ‘nŏh jang kiơ̆ trong chĕng găn lăm hŏk mưh đei bơ ngai jĭ F0, pơm ‘lơ̆ng ăn hnam trưng oei hơ nơ̆ng pơih ‘măng pơ tho hŏk pơ hrăm. Tơ̆ hop akŏm dôm bơ ngai juăt jang oei akhan, mă đơ̆ng đĭ ƀet vaccine bơih ră, mă lei tang găn jĭ pơ ma atŭm athei tơ chĕng truh tơ drong kơ nê̆ hlŏh, hăm tơ drong krê đei pơ rang jĭ ‘nao đơ̆ng virus gơ̆h tơ pŏh hrĕnh hlŏh dơ̆ng. Mưh 20 triu ‘nu hŏk tro năm hŏk tơ̆ hnam trưng ‘nŏh athei tơ chĕng truh tơ drong kơ sô̆ hơ iŏh tơ pŏh jĭ COVID-19 tŏk lơ.

Phó Thủ tướng Vũ Đức Đam pơ ma hơ dăh, tơ drong tang găn jĭ COVID-19 vă adrin vei lăng ‘lơ̆ng hlŏh jơ hngâm pran ăn kon pơ lei, mă loi jĭ vei lăng jơ hngâm pran ăn hơ iŏh. Phó Thủ tướng Vũ Đức Đam oei athei Anih tơm vei lăng jang pơ gang hơ len năng păng pơ tho tơ ƀôh trong hơ met jĭ hơ drô̆ ăn hơ iŏh jĭ COVID-19, atŭm hăm ‘nŏh pơ tho tơ ƀôh hơ tŏk trong vei lăng Lăm hơ met jĭ ăn hơ iŏh tơ̆ rim hnam pơ gang lơ̆m tĕh đak.

Dơ̆ng: Tơ blơ̆