Quân đoàn 34 pơtho ăn dôm khul jang athei bơ̆ jang mă ‘lơ̆ng, ming man trŏ năr hơgăt; kơchăng hơmet ming tơdrong pơvih pơvăn, bơ̆ jang kiơ̆ dôm tơdrong hơgăt găh vei lăng rơgŏh ‘lơ̆ng tơmam xa, bơ̆jang sơđơ̆ng ‘lơ̆ng păng vei lăng ‘lơ̆ng jơhngâm pran ăn ƀô đô̆i lơ̆m khei ‘năr năm bơ̆ jang.

‘Ngoăih kơ khul linh đơ̆ng Quân đoàn 34, lơ̆m khei bơ̆ jang tơm âu, Anih chĕp kơ̆l pơgơ̆r khul linh dêh char Gia Lai (Quân khu 5) kŭm vang tơgŭm năm man dôm hnam trưng teh đak rong tơ̆ tơring sơlam găh Pơmât kơ dêh char. Tơdrong vang tơgŭm đơ̆ng dôm khul linh gô tơgop hơtŏk hrĕnh tơdrong jang ming man, atŭm hăm ‘nŏh hơnơ̆ng tưk tơiung tơdrong ‘lơ̆ng hơiă đơ̆ng um ai bơngai linh Ƀô đô̆i Ƀok Hô ling lang vang yak hơdoi hăm tơring lơ̆m tơdrong vei lăng năng tông tơdrong pơtho hŏk pơhrăm tơ̆ tơring sơlam kơ dêh char Gia Lai.