Tơ̆ jơ tơƀâp, dôm bơngai tang măt chă pơđou dơ̆ng dôm tơdrong ‘lơ̆ng hơiă đơ̆ng hơdrĕch hơdrung, dôm tơdrong jơnei tih tên đơ̆ng khul linh păng kon pơlei lơ̆m tơdrong tơblăh, pơjing păng vei lăng teh đak 80 sơnăm âu ki; tưk tơiung jơhngâm đon ‘mêm kơ teh đak, ‘mêm chủ nghĩa xã hội, hưch hanh kơ hơdrĕch hơdrung, tơdrong juăt “Nhă đak ƀlŏk kơtu”, “’Mêm mơnat kơ bơngai đei kŏng”; vei kơjăp păng tưk tơiung tơdrong juăt jang kăch mang, jơhngâm đon ‘lơ̆ng đơ̆ng “Ƀô đô̆i Ƀok Hô” kơ Khul linh kon pơlei Việt Nam.

Đại tá Lương Đình Chung-Phŏ Chính uỷ Quân khu V hơpơi ‘mĕh đe bơngai kră jang kăch mang, đe yŏng linh, si kuan tih đĭ pơdơ̆h hưu bơih hơnơ̆ng tơƀôh trong chong glung, đei lơ tơdrong tơgop ‘lơ̆ng, đei yoa hlŏh dơ̆ng vă pơjing khul linh rơgei, pran kơtang, jang đang ‘lơ̆ng rim tơdrong đei pơjao, tơgăl hăm đon lui đơ̆ng Đảng, Teh đak păng kon pơlei.