Hop akŏm kŭm ăn tơgop nơ̆r lơ̆m hla ar chih Tơchơ̆t chĕp kơ̆l pơgơ̆r hơnăp jang khŭl lĭnh păng pơjing Đảng bộ Khŭl lĭnh sơnăm truh. Pơtôch hop akŏm, Tổng Bí thư Tô Lâm, Bí thư Quân ủy Trung ương pơma hơdăh sơnăm 2025, đĭ đăng khŭl lĭnh hlôi jang đang ‘lơ̆ng hơnăp jang, lơ̆m noh lơ hơnăp jang iŏk đei jơnei tôch kơ hơgei; tơdrong ‘lơ̆ng pơjing Đảng bộ Khŭl lĭnh hơnơ̆ng đei vei kơjăp.

Găh trong vă jang 2026, Tổng Bí thư athei Quân ủy Trung ương păng Anih tơm vei lăng Khŭl lĭnh tơlĕch 6 grŭp hơnăp jang tơm, lơ̆m noh vei kơjăp păng bơ̆jang kiơ̆ đei yua Tơdrong tơchơ̆t Hop akŏm XIV kơ Đảng păng 7 tơdrong tơchơ̆t gĭt kăl ‘nao tơlĕch ăn đơ̆ng Anih tơm Chĭnh trĭ. Tổng Bí thư pơma hơdăh đĭ đăng lĭnh athei tơroi bơngai jang ‘lơ̆ng, tơƀôh hơnăp jang iung jang hơdrol lơ̆m bơ̆jang kiơ̆ trong năm, tơdrong jang đơ̆ng Đảng, tơgop vei sơđơ̆ng khŭl lĭnh, sơđơ̆ng tơpôl păng hơtŏk tơiung teh đak.