Công ty pơm Mam pơsei Hòa Phát Dung Quất jĭ mĭnh lơ̆m hơnih mơdro sa tih hloh, tơmơ̆t lơ bơngai jang păng tơgop gĭt kăl lơ̆m tŏk tơmam drăm kmăi kmŏk pơm tơlĕch kơ dêh char Quảng Ngãi. Hrei ou Công ty đei 3 tơdrong vă jang tŏk bŏk jang lơ̆m dêh char Quảng Ngãi, đei: Hơnih jang pơm tơlĕch gang mam pơsei Hòa Phát Dung Quất 1; Hơnih jang pơm tơlĕch gang mam pơsei Hòa Phát Dung Quất 2; Tơdrong vă jang Dơnŏk container Hòa Phát Dung Quất tŏk bŏk roi năr roi pơkeh ‘lơ̆ng hơ iă.

Ƀok Hoàng Ngọc Phượng, Kơ iĕng kơdră chĕp pơgơ̆r Công ty Mam pơsei Hòa Phát Dung Quất tơbăt, jăl I sơnăm ou, mam pơsei ming man kơ hơnih pơm tơlĕch đei 692.000 tân. Hơnih mơdro sa hơnơ̆ng pơm hơtŏk pơm tơlĕch lơ lơ̆m jăl II, tơgop pơtrŭt kơtang tŏk lơ tơmam drăm kmăi kmŏk pơm tơlĕch kơ dêh char:“Hơnih lăng kơjăp akŏm pơm tơlĕch, tĕch mơdro ‘lơ̆ng hơ iă păng atŏk kơtang bơ̆ jang vei lăng ‘lơ̆ng kon jên tơmơ̆t jang; lăng kơjăp tơmơ̆t jên răt kmăi kmŏk, tơmam drăm, jang kiơ̆ khoa hŏk, kmăi kmŏk, tơplih kơsô̆, pơm hơtŏk đei tơmam drăm ‘lơ̆ng, lăng truh tơmam drăm ‘nao, tơmam drăm rơgoh ‘lơ̆ng păng trŏ ƀlep hăm tơdrong pơkăp ‘lơ̆ng apŭng plĕnh teh. Công ty jei tơlĕch jang hơ iă lơ̆m pơm tơlĕch, tĕch mơdro tơ̆ teh đak đe, atŏk kơtang iung jang pơm tơlĕch atŭm hăm tơ iung pơjing hơnăn tơmam drăm”.

Jăl I sơnăm 2026, tŏk GRDP kơ dêh char Quảng Ngãi jơnei 8,24%. Hơnih jang kmăi kmŏk pơm tơlech tơmam drăm hơnơ̆ng vei kơjăp hơnăp jang “Dơ̆ng hơlou”, tơgop lơ hloh mĭnh poăt trong pơkăp tŏk atum; hơnih jang pơm tơlĕch, pơm pơjing vei kơjăp tŏk ƀar kơsô̆. Tơdrong jang mơdro sa jei hơmet pơ ‘lơ̆ng hơdăh, akŏp tĕch mơdro tơmam drăm păng iŏk đei tŏk hloh 15%; tơmang pơhiơ̆ đei atŏk tơ iung; tĕch mơdro tơ̆ teh đak đe vei kơjăp hơyak tŏk ƀar kơsô̆. ‘Nou jĭ dôm tơdrong hơ iă hloh, pơjing đei hơyak pran vă dêh char hơnơ̆ng tơlĕch jang rim trong jang tŏk mŭk drăm lơ̆m khei năr kơnh.

Mă lei, kơsô̆ tŏk mŭk drăm tim mă lei lăi dih băl. Mĭnh ƀar tơdrong jang nhen sir iŏk tơmam drăm lơ̆m teh, pơm tơlĕch chơ khŏ hơnơ̆ng tơjur; thuê̆ ăn hơnih mong jên bơ̆ jang tơjur pơtêng hăm dôm khei ‘năr ou sơnăm hơdrol. Mă kăl, tơlĕch kon jên jang teh đak hiơ hiơ̆, ‘nao iŏk đei jơnei hloh 7% trong tơlĕch ăn, jĭ trong tơhlăk tơhlĭn tơm hloh kăl hơmet pơ ‘lơ̆ng.

Găh tơdrong choh jang sa, bri ‘long, ka hơdang lăp tŏk dang 3% kơ yuơ kon jên tơmơ̆t jang tŏk kơtang đơ̆ng khei 3, dui ba kơjă tơmam drăm, chơ pơdŭ tŏk măt, kon pơlei tơjur kon jên tơmơt jang choh jang sa. Găh tơdrong jang bri ‘long đei ƀơm ưh kơ ‘lơ̆ng kơ yuơ ‘măng pơdơ̆h Têt đunh năr; dăng rôp ka hơdang tơƀơ̆p tơnap tap kơ yuơ kơjă đak xăng đak dou tŏk măt. Lơ̆m hơnih jang kmăi kmŏk pơm tơlĕch tơmam drăm-tơ iung pơjing ming man, kmăi kmŏk pơm tơlech tơmam drăm tŏk 12, 76% găh lơ gơnơm tơmam drăm tơm nhen đak dou păng mam pơsei. Ƀok Võ Thành Nhân, Kơdră chĕp pơgơ̆r Hơnih jang Jô̆ hơlen dêh char Quảng Ngãi akhan:“Tơ iung pơjing ming man dang ei tơmơ̆t 4,9% lơ̆m tơdrong jang mŭk drăm; Tơ iung pơjing ming man tơjur 8,8% hlôi dui ba tơdrong tŏk GRDP lơ̆m dêh char tơjur. Lơ loh, mă đơ̆ng tơmơ̆t ưh kơ măh dôm yơ, mă lei tơdrong tơjur lơ̆m tơdrong jang ou oei ƀơm kơtang truh tơdrong tŏk mŭk drăm atŭm”.

Kon jên tơmơ̆t jang đơ̆ng teh đak hơnơ̆ng đei sơkơ̆t hơdăh jĭ hơyak kăl hloh ăn pơtrŭt tŏk mŭk drăm sơnăm 2026. Mălei, tơdrong tơlĕch kon kon jên jang oei tŏ sĕt, truh hơtuch jăl I ‘nao keh đang dang 7,2% trong tơlĕch jang. Dêh char Quảng Ngãi tŏk bŏk pơrô̆ jang kơtang hơmet pơ ‘lơ̆ng tơhlăk tơhlĭn vă atŏk kơtang iung jang tơlĕch kon jên jang ‘lơ̆ng hơ iă.

Kiơ̆ đơ̆ng ƀok Nguyễn Công Hoàng, Kơ iĕng kơdră chĕp pơgơ̆r Hơnih vei lăng kon pơlei dêh char Quảng Ngãi, trong tơlĕch kon jên tơmơt jang đơ̆ng teh đak kơ dêh char oei hiơ̆ hyĭn kơ yuơ đei lơ tơdrong pơm ăn. Tơ̆ tơring, lơ tơring tim gan pơ̆n tơlech jang lơ̆m jang kiơ̆, rơih tơdrong vă jang ‘nao ‘ngoăih tơgĕch iŏk rim tơdrong jang hlôi đei hla bơar apĭnh jang, pơm ăn truh hiơ hiơ̆ tơlech kon jên jang. Tơ̆ dêh char, tơhlăk tơhlĭn tơm oei găh bơ̆ jang hrŭ ăn, iŏk tơvih teh, sơkơ̆t hơdăh kơjă teh păng jơhngơ̆m đon ‘nhoen, hli kơ glăi. Ƀok Nguyễn Công Hoàng athei rim hơnih bơ̆ jang, rim tơring iung jang kơtang hơmet pơ ‘lơ̆ng rim tơdrong tơhlăk tơhlĭn, mă kăl lơ̆m tơdrong teh păng chĕp pơgơ̆r jang jên hu tơmơ̆t jang, vă tơlĕch jang kơtang rim tơdrong vă jang:“Hăm bơ̆ jang chĕp pơgơ̆r tơdrong jang jên hu, athei Hơnih jang jên hu dêh char Quảng Ngãi tơlĕch jang kơtang, ‘lơ̆ng hơ iă lơ̆m klăh asong păng iŏk yoa kon jên jang. Yan ou tŏk bŏk oei đei ƀôh tơdrong đei hơnih jang ming, tơdrong jang mă lei ưh kơ măh kon kon jên vă tơlĕch ăn, lơ̆m mă mĭnh ƀar kon jên jang tim mă gơh vă iŏk yoa. Tơdrong chĕp pơgơ̆r kăl đei lăng hơlen tôm tong, mă kăl lơ̆m khei ‘năr kon jên iŏk đei đơ̆ng thuê̆ iŏk yoa teh tim mă iŏk đei ƀlep trong tơlĕch ăn. Adoi, kăl dăr lăng kơjăp iŏk yoa kon jên jang, veh ver lăp hơmŏ đơ̆ng kon jên tim gan băt hơdăh đei dăh mă ưh, hơmơt đei truh tơdrong ưh hơtŏ dih băl kon jên bơ̆ jang”.