Ƀar ‘nu Tổng Bí thư, Kơdră teh đak vang tơƀôh jơhngơ̆m đon chơt hơiă tơ̆ hơnăp dôm hơyak hơtŏk tơiung ‘lơ̆ng hơiă đơ̆ng tơdrong pơvei 2 Đảng, 2 teh đak khei ‘năr âu ki, mă hơdăh ‘noh jĭ pơma dơnuh tơdrong jang kơdră kơpal pơgơ̆r ‘lơ̆ng, dôm trong jang hơdai roi ‘năr roi tôm tong, lơ, lui ngeh; jang hơdai vei lăng sơđơ̆ng - khŭl lĭnh tơplih đơ̆ng tơƀơ̆p hơdai băl jing jang hơdai tơpă hloh: jang hơdai mŭk drăm - tĕch mơdro, tơmơ̆t jên jang, tơƀưh trong nơnăm đei lơ tŏk ‘nao, jang hơdai tơring, tơƀơ̆p pơma dơnuh băl đơ̆ng kon pơlei chơt hơiă; jang hơdai lơ pang roi ‘năr roi kơjăp.

Ƀar kơdră chĕp kơ̆l pơma hơdăh, lơ̆m khei ‘năr krê hơmơt đơ̆ng tơdrong apŭng plĕnh teh, 2 Đảng, 2 teh đak kăl kơ mĭnh jơhngơ̆m đon kơjăp, hơtŏk loi dơ̆ng đon lui gĭt kăl, tơgoăt hơdai trong jang tơgŭm, tĕch mơdro, anih jang kăl, ŭnh hơyuh, hơnơ̆ng pơm ‘lơ̆ng, hơtŏk hloh dơ̆ng tơdrong pơvei Việt Nam - Trung Quốc lơ̆m jăl jang ‘nao, tơgop ‘lơ̆ng ăn tơdrong rơngei, jang hơdai păng hơtŏk tơiung kơ tơring păng lơ̆m apŭng plĕnh teh.

Găh trong vă jang hơtŏk tơiung pơvei 2 Đảng, 2 teh đak tơ̆ hơnăp kơnh, 2 kơdră chĕp kơ̆l pơma hơdăh gô hơnơ̆ng athei rim kơdră, rim anih jang bơ̆jang kiơ̆ tơdrong hơgăt akŏm “06 hloh” pơvei tơƀơ̆p pơma dơnuh kơdră kơpal hơnơ̆ng, hơtŏk ‘lơ̆ng đei yua hơnăp jang gĭt kăl đơ̆ng kênh Đảng, hơtŏk loi dơ̆ng jang hơdai tơpă lơ̆m rim tơdrong jang, hơmet ming trong jang tơpôl ăn pơvei 2 pang, jang hơdai kơjăp tơ̆ dôm trong jang lơ pang, vei lăng păng hơmet pơ ‘lơ̆ng tơdrong oei đei, ưh kơ lăp băl.

Tơ̆ pơma đam, 2 kơdră chĕp kơ̆l pơtơm tơchơ̆t hơdăh tơlĕch jang “Sơnăm jang hơdai tơmang lăng Việt Nam - Trung Quốc 2026 - 2027”, drơ̆ng nơ̆r tŭn pran dôm tơdrong jang hơdai, roi tơƀôh pơtrŭt tơmang lăng, jang hơdai pơm hơtŏk anih jang kăl, pơvih pơvăn tơmang lăng, hơmet ming păng vei kơjăp anih dơ̆ng ‘noh jĭ tơdrong jang găh tơmoi tơmang lăng tih hloh đơ̆ng băl.