Kiơ̆ tơdrong tơchơ̆t đơ̆ng Anih vei lăng kon pơlei dêh char Quảng Ngãi, tơdrong tơmơ̆t dơ̆ng tơdrong hơgăt vă pơm lăp hăm ‘meh vă hŏk pơhrăm đơ̆ng hŏk tro đơ̆ng rŏng kơ dăr hơlen tơdrong sơng iŏk đơ̆ng rim anih pơtho pơhrăm, vei sơđơ̆ng trŏ lăp hăm tơdrong anih jang, tơmam drăm, khŭl thây kô pơtho păng ‘meh vă ‘lơ̆ng pơtho pơhrăm. Anih vei lăng kon pơlei dêh char Quảng Ngãi pơjao kơ Anih vei lăng găh Pơtho pơhrăm lăng kiơ̆ pơtôch dăr hơlen tơdrong sơng iŏk đơ̆ng rim anih pơtho pơhrăm vă tơchơ̆t hơgăt rơih hŏk tro mơ̆t hŏk tơmơ̆t dơ̆ng hơdăh ăn kơ rim hnam trưng hŏk jăl 3 păng anih pơtho pơhrăm hơnơ̆ng. Tơdrong rơih hŏk tro mơ̆t hŏk athei đei bơ̆jang kiơ̆ tơpăt, rơđăh, trŏ tơdrong hơgăt păng iŏk yua jơnei anih jang, tơmam drăm, khŭl thây kô pơtho dang ei đei.

Ƀok Nguyễn Ngọc Thái, Kơdră Anih vei lăng găh Pơtho pơhrăm dêh char Quảng Ngãi tơbăt, tơdrong băt hơdăh ăn rơih tơmơ̆t hŏk tro mơ̆t hŏk đei lăng kiơ̆ dôm tơdrong hơgăt đơ̆ng Khŭl kơdră teh đak; hơdai hăm jô̆ hơlen kiơ̆ tơdrong yan âu găh anih jang, tơmam drăm, lăm hŏk, kơmăy kơmŏk păng khŭl thây cô pơtho kơ rim hnam trưng. Sơnăm hŏk âu ki, kơsô̆ hŏk tro hŏk đang jăl 2 tŏk pơting hăm dôm sơnăm hơdrol kơna ‘meh vă mơ̆t hŏk lăm 10 hnam trưng teh đak kŭm lơ hloh.

Đơ̆ng rŏng tơbăt hơdăh điểm rơih hŏk tro mơ̆t hŏk ‘măng mă 1, kơsô̆ hŏk tro tam mă đei gơh mơ̆t hŏk lơ̆m dôm hnam trưng teh đak oei tôch kơ lơ. Anih vei lăng găh pơtho pơhrăm dêh char Quảng Ngãi hlôi dăr hơlen dơ̆ng tơdrong hiôk kơ rim anih pơtho pơhrăm, mă loi ‘noh jĭ tơdrong lăm hŏk păng kơsô̆ thây kô pơtho lơ̆m 1 lăm kiơ̆ hơgăt đơ̆ng Anih tơm vei lăng găh Pơtho pơhrăm, apĭnh tơmơ̆t dơ̆ng kơsô̆ hŏk tro mơ̆t hŏk. Ƀok Nguyễn Ngọc Thái, Kơdră Anih vei lăng găh Pơtho pơhrăm dêh char Quảng Ngãi roi tơbăt: 

“Dang ei oei 4 hnam trưng tam mă rơih tôm hŏk tro kiơ̆ tơdrong hơgăt đei pơjao ‘noh Hnam trưng hŏk teh đak rong Măng Đen; Hnam trưng hŏk jăl 3 Đinh Tiên Hoàng (apŭng Sơn Tây so), Hnam trưng hŏk jăl 3 Tây Trà (apŭng Trà Bồng so) păng Hnam trưng hŏk jăl 2 păng jăl 3 Phạm Kiệt (apŭng Sơn Hà so). Hăm dôm hnam trưng âu, Anih vei lăng găh Pơtho pơhrăm gô sơng iŏk ‘meh vă tơmơ̆t dơ̆ng păng hơnơ̆ng set rơih kiơ̆ tơdrong kăl iŏk điểm đơ̆ng lơ jur tơ̆ tŏ sĕt vă vei sơđơ̆ng iŏk tôm tơdrong hơgăt hlôi đei Anih vei lăng kon pơlei dêh char pơjao. Hơdai hăm ‘noh, Anih vei lăng găh pơtho pơhrăm kŭm gô drơ̆ng 1 nơ̆r hăm rim hnam trưng vă bơ̆jang tơdrong rơih hŏk tro mơ̆t hŏk tơmơ̆t dơ̆ng.”

Tơdrong tơmơ̆t vă jê̆ 2.000 ‘nu hŏk tro mơ̆t hŏk lăm 10 hnam trưng teh đak ưh khan lăp pơm lăp hăm ‘meh vă hŏk pơhrăm đơ̆ng hŏk tro mă oei tơgop hơtŏk ‘lơ̆ng bơngai jang, vei sơđơ̆ng tơdrong hiôk gơh hŏk pơhrăm ăn bơngai hŏk kiơ̆ tơdrong tơchơ̆t kơsô̆ 71 đơ̆ng Anih tơm Chĭnh trĭ găh tơplih ‘nao ‘lơ̆ng, tôm tong pơtho pơhrăm, pơm lăp hăm ‘meh vă hơtŏk tơiung teh đak lơ̆m jăl jang ‘nao.