Kơdră chĕp kơ̆l ‘nao kơ Anih tơm sek tơlang kon pơlei hlôi pơma pơsĭt kiơ̆ tơdrong hơgăt. Pơma iŏk kơchư̆k jang, Kơdră chĕp kơ̆l ‘nao kơ Anih tơm sek tơlang kon pơlei Nguyễn Văn Quảng tơƀôh jơhngơ̆m bơnê kơ Khŭl chĕp kơ̆l pơgơ̆r Trung ương, Anih tơm Chĭnh trĭ, Ban Bí thư, Tổng Bí thư Tô Lâm păng rim Kơdră chĕp kơ̆l Đảng, Teh đak lui ngeh pơjao hơnăp jang ‘nao, Quốc hội lui pôk ƀok pơm Kơdră chĕp kơ̆l Anih tơm sek tơlang kon pơlei.

Kiơ̆ lơ̆m kơchư̆k jang ‘noh jĭ bơngai chĕp kơ̆l anih jang sek tơlang, anih jang pơm kiơ̆ tơdrong pơm tơm tư pháp kiơ̆ tơdrong hơgăt đơ̆ng khôi luơ̆t teh đak Cộng hòa xã hội chủ nghĩa Việt Nam, Kơdră chĕp kơ̆l Anih sek tơlang kon pơlei Nguyễn Văn Quảng roi tơbăt gô bơ̆jang kiơ̆ ƀlep nơ̆r pơsĭt tơ̆ hơnăp Quốc hội, pơm kiơ̆ tơdrong chĕp kơ̆l đơ̆ng Đảng, jang kiơ̆ ƀlep dôm tơdrong tơchơ̆t păng hơgăt đơ̆ng khôi luơ̆t teh đak.