Ƀok Kơdră Trần Thanh Mẫn pơma hơdăh Việt Nam ling lang năng kăl păng hơpơi ‘mĕh pơm pơ ‘lơ̆ng hlŏh dơ̆ng tơdrong pơvei gĭt kăl, jang hơdoi hơdoi tôm tơdrong hăm Cuba; atŭm hăm ‘nŏh tơchĕng ‘lơ̆ng dôm tơdrong jơnei mă Đảng, Teh đak păng kon pơlei Cuba iŏk đei đơ̆ng rŏng kơ Hop akŏm mă VIII.

Găh kơdih kâu, Kơdră Quốc hội Cuba bơnê jơhngâm đon ‘mêm băt, tơdrong tơgŭm đơ̆ng kon pơlei Việt Nam, mă loi ‘nŏh dôm tơdrong vang tơra tơgop, tơgŭm đơ̆ng Mặt trận Tổ quốc păng Jơnŭm ‘long pơglang ƀrê Việt Nam tơlĕch. Ƀok pơma hơdăh ‘nâu jĭ tơdrong ‘lơ̆ng hlŏh tơƀôh hơdăh tơdrong pơvei gĭt kăl đơ̆ng 2 teh đak, atŭm hăm ‘nŏh akhan tơdrong tơgŭm gô đei iŏk yoa vă sek tơlang dôm tơdrong kăl, pơyoa ăn tơdrong arih xa kơ kon pơlei. 2 păh drơ̆ng nơ̆r hơtŏk tơdrong jang hơdoi nghị viện, hơnơ̆ng pơm hơtŏk tơdrong pơvei gĭt kăl Việt Nam – Cuba, năng ‘nâu jĭ  “tơdrong ‘lơ̆ng” lơ̆m tơdrong pơvei kơ apŭng plenh teh.