Đơ̆ng rŏng kơ mơ̆ng dôm hơnih jang kơ Rađiô nơ̆r pơma Việt Nam tơroi gah tơdrong pơvih hơmet ăn Tơdrong pơlong pơih pơre nơ̆r jơ̆p teh đak 'măng mă 17, pơma pơtôch 'măng pơm jang, Phŏ Kơdră dơnơm kơ Rađiô nơ̆r pơma Việt Nam Phạm Mạnh Hùng, Kơdră Jơnŭm pơgơ̆r pơlong Pơih pơre nơ̆r jơ̆p teh đak lui ngeh, hăm tơdrong hơmet tơnăp 'lơ̆ng, Tơdrong pơlong Pơih pơre nơ̆r jơ̆p teh đak 'măng mă ou gô jing gru kơnăl kăp gĭt hơtŏk tơ-iung 'nao ăn tơdrong pơre nơ̆r kơ jơ̆p teh đak păng rim bơngai chih kơtơ̆ng, bơngai jang kih thuơ̆t akŏm kơchăng tôm tơdrong yak hơdoi hăm kon pơlei vă pơm kiơ̆ tơnăp tơchơ̆t hơtŏk tơ-iung kơ teh đak lơ̆m chăl jang 'nao.

Dôm tak phâm pơtruh pơlong đei lơ kơluăi kăp gĭt kơ tơdrong tơroi pơre nơ̆r nhen: tơdrong pơre nơ̆r kơtă; ƀai chih tơroi, ƀai chih gah dăr hơlen; tơdrong tơroi juăt jang, tơdrong tơroi pơma nơ̆r kon kông. Mă kăl,'măng pơlong pơih pơre nơ̆r ou 'măng mă blŭng, Rađiô nơ̆r pơma Việt Nam pơkăp pơlong gah Podcast – tơdrong tơroi pơre nơ̆r tŏk bŏk oei hơtŏk kơtang lơ̆m tơdrong jang kơmăi kơsô̆; pơgơ̆r Pơma đam apŭng plenh teh păng Lêh pơtơm Tơdrong joh ayŏ kơdŏ suang hơnăn “Tơdra kơ anglŏ sơnăm 'nao” pơgơ̆r tơ̆ Cham să 30/10, phương Hạ Long hăm tơdrong vang akŏm đơ̆ng lơ ngê̆ sih, bơngai đei ƀơ̆r hơri hiôk mă đe ư ang păng kơ rơbou bơngai mơ̆ng lăng.