VOV4.Bahnar - Pơgê năr 11/2, tơ̆ 58 Quán Sứ, Hà Nội, Radiô Nơ̆r Pơma Việt Nam pơgơ̆r Pơm lêh tơbăt Năr Rapor kơtơ̆ng ang apŭng plĕnh tĕh hăm hơnăn “Rapor kơtơ̆ng ang păng tơdrong lui kiơ̆ kơ jăp” păng pơma dơnŭh gĭt kăl găh hơnăp jang păng trong iung jang kơ Rapor lơ̆m chăl hle vă tơdrong rapor ling lang jing tơdrong jang lui kiơ̆ kơ jăp hăm tơmoi chă mơ̆ng. Tơ̆ jơ hop akŏm pơma dơnŭh, rim bơngai joăt jang lơ̆m tĕh đak păng tĕh đak đe sơkơ̆t hơdăh, rapor oei jing kơtơ̆ng ang tĕnh koăng, trŏ ƀlep, jơ̆p jang, mă lei kăl hơnơ̆ng kiơ̆ yok dôm trong jang ‘lơ̆ng hơ iă kơ dĭh vă hơvơn roi lơ bơngai vang chă mơ̆ng. Hăm tơdrong atŏk tơ iung kơ kmăi kmŏk, Rapor oei jing tơdrong kơnăl găh tôm tong ‘lơ̆ng hơ iă hlŏh, lơ nơ̆r pơma păng tôm tong kơ bơngai jang rapor. Rim bơngai joăt jang găh rapor akhan, Tơdrong jang kơtơ̆ng ang pơma atŭm păng rapor kăl tơplĭh ‘nao kơ dĭh bơ̆n, kiơ̆ yok dôm tơdrong hơ iă kơ dĭh đei kơ rim tơdrong jang kơtơ̆ng ang, hơnhăk kơtơ̆ng ang tĕnh koăng, trŏ ƀlep păng mă kăl lăp đon vă atŏk kơtang tơdrong lui kiơ̆ kơ jăp đơ̆ng bơngai mơ̆ng, bơngai chă đŏk lăng.

Tơblơ̆ nơ̆r: Amazưt