VOV4. Bahnar - Pơgê năr 8/6, Dơnŏ anĭh tơm vei lăng Hnam trương pơtho pơhrăm pơgơ̆r hop akŏm trư̆k tuyên găh bơ̆ jang pơgơ̆r pơlong lĕch ‘măng khoă jăl pêng sơnăm 2022. Vang hop akŏm đei Dơnŏ anĭh chĕp pơgơ̆r vei lăng pơlong kơ 63 dêh char, pơlei tơm păng tang măt ăn rim hơnĭh tơm, hơnĭh bơ̆ jang ƀơm trŭh.

Rup hop akŏm găh bơ̆ jang pơgơ̆r pơlong lĕch ‘măng khoă jăl pêng sơnăm 2022

‘Măng pơlong sơnăm au gô đei pơgơ̆r lơ̆m rim năr 7 păng năr 8/7 kơnh. Trŭh dang eiDơnŏ anĭh tơm vei lăng Hnam trương pơtho pơhrăm hlôi pơjing tôm hla bơar pơrô̆ jang, pơtho tơbăt găh pơgơ̆r pơlong lĕch ‘măng khoă jăl pêng sơnăm 2022. Jô̆ trŭh 5 jơ kơsơ̆ năr 5/6, rim hơnĭh hlôi jang keh đang kĭ tơchơ̆t hla bơar apĭnh pơlong. Tơbăt tơ̆ hop akŏm, rim tơring tơroi tơbăt, hlôi pơtôch tơdrong jang sơnăm hŏk ăn hŏk tro lăm 12 kiơ̆ trong hơmet ăn hơdrol păng dang ei tŏk bŏk vei kơ jăp chă pơtho ming ăn hŏk tro. Rim tơring jei pơjing Dơnŏ anĭh chĕp pơgơ̆r pơlong dêh char, apŭng vă pơgơ̆r pơlong 'lơ̆ng hơ iă hlŏh. Rim bơ̆ jang hơmet ăn găh tơmam drăm, khŭl bơ̆ jang ăn ‘măng pơlong hlôi đei tơlĕch, sơđơ̆ng ăn pơgơ̆r hrơ̆p mĭnh ‘măng lơ̆m tĕh đak kiơ̆ trong hơmet hơdrol.

Tơblơ̆ nơ̆r: Amazưt