Hnam kơmăi 'măn prĕl, pơm tơlĕch tơmam drăm đơ̆ng tơmam choh pơtăm vă tĕch ăn teh đak đe tơ̆ Hơnih kŏng ngĭp Tâm Thắng, xah Cư Jút, dêh char Lâm Đồng, lơ̆m hơnih teh să 22.000 m². Hnam kơmăi đei kơsô̆ jên ming man 150 tih hlj, kĕ 'măn jing prĕl 15.000 tơ̆n sâu riêng păng pơm tơlĕch đei 13.000 tơ̆n chăn hroi rim sơnăm, asong tơdrong jang ăn pơhlom 250 bơngai jang tơ̆ tơring. Tang măt ăn hơnih jang mŭk drăm, yă Nguyễn Thị Thái Thanh ăn tơbăt, hnam kơmăi gô pơm jang kiơ̆ pơkăp pơm tơlĕch lơ tơdrong kăp gĭt. 'Nguaih kơ tơmam drăm tơm noh sâu riêng, chăn hroi, gô đei lơ tơmam drăm nai:  “Nhôn kĭ pơkăp jang hơdoi hăm minh hơnih jang kơ teh đak Úc, hơnih jang mŭk drăm juăt chă răt, pơm tơlĕch ngar Biochar đơ̆ng kơđoh sâu riêng păng chăn hroi. Tơdrong mă ou gô tơgŭm ăn kơ nhôn chă răt kơđoh chăn hroi păng sâu riêng, đơ̆ng ou gô pơjing tơdrong jang lơ̆m pơkăp choh jang xa 'lơ̆ng hloh”

Pơma ah lêh et hơtŏk hnam kơmăi, ƀok Lê Trọng Yên, Thư̆ trương Hơnih tơm Choh jang xa păng Cham char ăn tơbăt, tơmam choh pơtăm Việt Nam tĕch ăn teh đak đe lơ̆m sơnăm ou đei truh 70 tih đôlar; gah sâu riêng đei yua jê̆ 4 tih đôlar. Lơ̆m 8 khei kơ sơnăm ou, sâu riêng tĕch ăn teh đak đe đei  2 tih đôlar, tŏk 26% pơtêng hăm khei năr ou sơnăm sơ̆. Hơnih tơm gô pơtoi yak hơdoi hăm rim tơring pơjing tơdrong choh jang xa hơgei 'lơ̆ng, hơtŏk tơdrong kăp gĭt ăn tơmam drăm choh pơtăm, lơ̆m noh đei sâu riêng.

Thư̆ trương Hơnih tơm Choh jang xa păng Cham char pơtruh nơ̆r hăm hơnih jang mŭk drăm, hơnih juăt jang păng kon pơlei jang mir tơ̆ Tây Nguyên hơtŏk pơjing tơdrong jang hơdoi, pơjing tơdrong kăp gĭt vă pơm tơlĕch tơmam drăm; atŭm hăm noh kơchăng băt hơdah tơdrong kăl kơ tơring răt yua vă pơjing hơnăn ăn tơmam drăm choh pơtăm:  “Bơ̆n athei pơm tơlĕch tơmam drăm păng pơm kiơ̆ tơdrong mă tơring kăl răt yă kiơ noh bơ̆n akŏm pơm tơlĕch mă noh, vă pơjing hơnăn choh jang xa Việt Nam pơma atŭm păng tơdrong jang sâu riêng pơma hơdrô̆. Bơ̆n kăl đei tơdrong tơplih đơ̆ng pơyan jang tơm, ưh hơdrô̆ pơm krot ('măn prĕl) sâu riêng mă athei pơih să hăm plei 'long xa nhen bơ, hơmrĕ, chăn hroi... păng dôm tơmam choh pơtăm nai. Đơ̆ng noh, pơjing kơjăp dôm tơmam choh pơtăm kơ Việt Nam  'măn tĕch ăn teh đak đe”.

Đơ̆ng rŏng kơ et hơtŏk, hơnih jang mŭk drăm hlôi kĭ jang hơdoi hăm minh ƀar hơnih răt akŏm tơmam choh pơtăm truh đơ̆ng teh đak Úc, Trung Quốc păng Phalăng, pơkăp truh tơdrong pơjing trong jang hơdoi tĕch răt tơmam choh pơtăm. Mă kăl, hơnih jang mŭk drăm hlôi tĕch tơmam drăm sâu riêng pơm krot ('măn prĕl) mă blŭng ăn teh đak  Trung Quốc, đei 2 container hăm kơsô̆ trăp truh 54 tơ̆n.