Akŏp kơsô̆ jên iŏk đơ̆ng sek phak hloh 123 ti hlak jên. Dôm tơmam pơm glăi găh lơ ‘noh: ‘long tơ̆r dôm kơ loăi, phŏng, pơgang vei lăng ‘long pơtăm; phơ̆ng ƀrĕo; hơbăn ao, chơ khŏ; tơmam pơngôi ăn hơioh, hơ̆t gret răt tơmơ̆t đơ̆ng teh đak đe, hơ̆t điện tử.

Tơ̆ hop akŏm pơtôch tơdrong jang iung jang tang găn tĕch mơdro ôn, pơgơ̆m, tơmam ya pơgơ̆r kơ sơ̆ ‘năr 6/1, ƀok Nguyễn Tuấn Hà, Phŏ kơdră Anih vei lăng kon pơlei dêh char Dak Lak akhan, mă đơ̆ng kơsô̆ tơdrong păng kơsô̆ jên phak pơm glăi tŏk pơtêng hăm sơnăm hơdrol, mă lei oei tam mă tơroi ƀlep yan âu găh dôm tơdrong pơm glăi lơ̆m tơdrong tơmam lơ̆m tơring. Tơ̆ hơnăp kơnh dôm anih jang kơpal kăl kơ lăng kiơ̆ tơplih đơ̆ng anih tĕch mơdro, hơtŏk ‘lơ̆ng iŏk yua tơdrong jang tơdra hơdrol, hơmet ăn tôm dôm tơdrong hiôk vă vei sơđơ̆ng anih tĕch mơdro, mă loi ‘noh jĭ năr Tết Quý Mão vă jê̆ truh.