VOV4.Bahnar - Pơ gê 7/3, tơ̆ thĭ trơ̆n Plây Kần, apŭng Ngọc Hồi, Khul kơ dră chĕp kơ̆l Anih jang đoan dêh char Kon Tum pơm lêh tơ lĕch Khei druh dăm păng Tơ drong jang khei 3 Tơ ring sơ lam – Tơ ring sơ lam tĕh đak nhôn sơ năm 2022.

Pơ jao the Đoàn viên păng Grat Đoàn ăn đe đoàn viên ‘nao

Tơ̆ jơ pơm lêh, Khul kơ dră chĕp kơ̆l Anih jang đoan dêh char Kon Tum krao hơ vơn kăn ƀô̆, đoàn viên, druh dăm, hơ iŏh iĕ lơ̆m khei 3 - Khei druh dăm sơ năm 2022 tơ iung jơ hngâm đon tơ năp, năm jang hơ drol, bơ̆ jang tơ gŭm, vang pơ jing anih jang, pơm trong, iŏk jang tơ drong jang druh dăm vă hơ iă kơ Hop akŏm Đoàn jơ̆p tơ ring păng 91 sơ năm Năr pơ jing Đoàn TNCS Hồ Chí Minh; bơ̆ jang đei yoa ‘lơ̆ng dôm tơ drong jang tang găn jĭ COVID-19; vei sơ đơ̆ng tơ drong arih xa tơ pôl, “Nhă đak ƀlŏk kơ tu - Tơ gŭm ăn bơ ngai đei kŏng”; dôm tơ drong tơ gŭm ăn druh dăm iung jang xa; tơ gŭm vei lăng đe đoàn viên, druh dăm, hŏk tro, sinh viên, hơ iŏh đei tơ drong arih xa mơ mat tat…

Hơ păh tơ mam ăn đe druh dăm đei tơ drong arih xa mơ mat tat

Ƀlep ƀât ‘măng mă âu Khul druh dăm păng Khul drŏ kăn Anih tơm vei lăng Công an pơ jao 10 trong jang xa atŏk tơ iung mŭk drăm, đei 1.000 tŏ iĕr yŏng chĕh kơ tăp ăn 10 unh hnam đei kŏng, unh hnam mơ mat tat dêh hlŏh, bơ ngai pơ tho lui khop tơ̆ tơ ring kon kông, tơ ring đei tơ drong lui khop; kŭm hăm lơ tơ mam ăn hŏk tro tơ̆ tơ ring mơ mat tat găh tơ ring sơ lam kơ dêh char Kon Tum.

Dơ̆ng: Tơ blơ̆