VOV4.Bahnar - Jĭ jơ hnơr đei rơ nĕh lơ̆m khei ‘năr rơ ngei hiôk hian, ‘nhŏng A Phun, bơ̆ jang tơ̆ Anih pơ tho tơ drong jang - Pơ tho pơ hrăm hơ nơ̆ng apŭng Tu Mrông, dêh char Kon Tum hơ nơ̆ng tơ ƀôh đon băt bơ nê kơ jơ hnơr mĕ ƀă, yă ƀok hlôi hŭt plang hơ kâu yoa tơ drong rơ ngei kơ tĕh đak. Rim ‘măng truh năr tơ blăh iŏk rơ ngei tơ ring pơ băh, pơ jing đei 1 tĕh đak kơ jăp ‘lơ̆ng 30/4, ‘nhŏng hơ nơ̆ng chông ba kon kăn năm ngôi tơ̆ Anih gru groa kơ Jơ hnơr arih kăch mang Kăn kư̆ anih jang đảng dêh char Kon Tum tơ̆ xăh Măng Ri. Tơ̆ âu đơ̆ng 1960-1972, Anih jang đảng dêh char Kon Tum pơ gơ̆r đei 4 ‘măng hop akŏm đảng ƀô̆ dêh char (Đơ̆ng Hop akŏm mă I, ‘năr 9/3/1960 truh hop akŏm mă IV, ‘năr 26/10/1971), tơ lĕch lơ trong jang gĭt kăl, chĕp kơ̆l pơ gơ̆r khul linh păng kon pơ lei dôm hơ drĕch hơ drung vang iung tơ blăh Mi, dŏng tĕh đak.

‘Nhŏng A Phun pơ ma: “Kơ dih kâu inh jơ hnơr đơ̆ng rŏng, oei ‘lơ̆p, tôch bơ nê kŏng đe mĕ ƀă, yă ƀok sơ̆ hlôi hơ nhăk tơ drong arih xa ‘lơ̆ng nhen hrei ‘nâu. Hăm jơ hngâm đon adrin hŏk pơ hrăm, hŏk iŏk dôm tơ drong ‘nao, tơ drong mă blŭng inh tơ chĕng ‘nŏh athei pơm kiơ̆ mă ‘lơ̆ng dôm trong jang đơ̆ng Đảng, khôi luơ̆t tĕh đak, hơ nơ̆ng hŏk pơ hrăm vă hơ tŏk đon hlôh vao, bơ̆ jang gơ̆h, hlôh vao lơ lơ̆m tơ pôl, chă rơih iŏk dôm tơ drong hơ iă vang tơ iung pơ jing tơ ring roi đunh roi tŏk pran ‘lơ̆ng, tơ găl hăm tơ drong jang tŏk atŭm kơ tĕh đak. Inh 1 jơ hngâm kiơ̆ Đảng, kiơ̆ Ƀok Hô, vang tơ gop kơ sư̆k kơ dih vă pơ jing tơ ring roi đunh roi pơ drŏng, ‘lơ̆ng rŏ ƀiơ̆”.

Hơ drin tơ chă, hŏk pơ hrăm, tơ mơ̆t yua khoa hŏk ki thuơ̆t lơ̆m pơ gar mir, ŭnh hnam ‘nhŏng Điểu Nanh, oei tơ̆ plei Bu N’Jang, xăh Trường Xuân, apŭng Đăk Song, dêh char Đắk Nông hlôi đei tơ drong arih sa đei ƀôh. ‘Nhŏng Điểu Nanh tơ băt, sơ năm 2011, sư pơ̆n tŏk iŏk jên đơ̆ng anih mong jên tơ gŭm răt ‘long hơ drĕch, phŏng tơ mơ̆t jên jang pơ tăm 8 hek cheh phe, tiu păng rim sơ năm pơ tăm hơ lam ƀum ngô, hơ ƀo vă iŏk kơ đeh rong kơ jung. Iŏk đơ̆ng pơ gar cheh phe, tiu ăn phĕ tĕch sơ đơ̆ng, mŭk drăm kơ ŭnh hnam sư roi ‘năr roi kơ jăp, man đei hnam ‘lơ̆ng, răt gre ô tô păng tơ mơ̆t jên jang ăn kon hơ ‘lơ̆p hŏk pơ hrăm. Kŭm hăm hơ tŏk tơ iung mŭk drăm, sư oei ăn kon pơ lei tŏk iŏk jên ưh kơ jô̆ jên cheh kơ hrĕng triê̆u hlak jên vă đei jên jang sa, păng hlôi tơ gŭm 6 ŭnh hnam lơ̆m pơ lei yak hloh klăih đơ̆ng dơ nuh hin. ‘Nhŏng Điểu Nanh tơ roi: “Gơ nang đơ̆ng tơ drong bơ ngơ̆t truh đơ̆ng Đảng teh đak, tơ drong arih sa ĭnh dang ei kŭm păi ƀiơ̆ kơ hơ drol tôch kơ lơ. Ĭnh jang mŭk drăm, jang cheh phe, kơ su đei iŏk yua kŭm sơ đơ̆ng. Ĭnh kŭm đei kon pơ lei lui ngeh, ‘mêm kơ eng rơ̆ih pơm bơ ngai pơ gơ̆r pơ lei vă gơh tơ gŭm dơ̆ng lơ bơ ngai hơ tŏk tơ iung mŭk drăm.”

Ưh pŭn jo tơ̆ jâng đơ̆ng ‘lơ̆ng, ‘nhŏng Y Phăng MLô, tơ̆ plei Jok, xăh Ea H’Đing, apŭng Cư Mgar, dêh char Dak Lak adrin yak hlŏh mơ mat tat vă jang xa, vei rong kơ dih kâu. ‘Nhŏng chă hŏk pơ hrăm, pơih anih pơm kơ chŏu pơ tăm ‘long pơ rŏ, kơ ƀinh pơ kao vă chă jên, tơ gŭm ăn unh hnam. Truh dang ei, đơ̆ng rŏng vă jê̆ 8 sơ năm iung jang xa, ‘nhŏng chă đei anih tĕch tơ mam tôch sơ đơ̆ng, jô̆ păh lăp 1 khei ‘nhŏng pơm, tĕch đei kơ hrĕng tŏ kơ chŏu, 1 sơ năm jang xa rơ kăh đei hlŏh kơ hrĕng triu. ‘Nao âu, ‘nhŏng chơt hơ iă đei pôk pơ ư jĭ 1 lơ̆m 50 ‘nu druh dăm jo jăn "Ang hơ dăh đon adrin Việt" sơ năm 2021 yoa Trung ương Khul druh dăm Việt Nam jang hơ doi hăm Anih jang kơ tĕh đak găh bơ ngai jo jăn Việt Nam pơ gơ̆r.

Y Phăng Mlô tơ roi: “Kơ dih kâu inh athei adrin yoa ba thoi nŏh bơih, kŭm ưh ‘mĕh mĕ ƀă, kơ tum kơ tŏng ‘nhŏng ŏh pơ ngơ̆t ăn ba. Nhen dang ei tơ drong jang sơ đơ̆ng, inh ‘mĕh truh âu kơnh jang tŏk hlŏh dơ̆ng, đei lơ bơ ngai băt truh anih jang inh. Mưh pơih xă đei tơ drong jang xa ‘nŏh inh vă iŏk dơ̆ng bơ ngai jang, chă tơ drong jang ăn dôm bơ ngai tam mă đei tơ drong jang.”

Dơ̆ng hăm Thuem: Tơ blơ̆