VOV4.Bahnar - Pơ gê ‘năr 15/9, tơ̆ Hà Nội, pơ gơ̆r Hop akŏm khoa hŏk hăm hơ năn “Sơ năm mơ lôh Việt Nam – Lào hŏk pơ hrăm păng pơm kiơ̆ đon tơ chĕng đơ̆ng kơ dră Hồ Chí Minh păng Kơ dră Cay-sỏn Phôm-Vi-Hản” yua đơ̆ng Trung ương Đoàn hơ druh tơ dăm Cộng sản Hồ Chí Minh jang hơ dai hăm Anih tơ roi tơ băt Trung ương pơ gơ̆r. ‘Nâu jĭ tơ drong jang ‘lơ̆ng hơ iă tơ băt 60 sơ năm Năr pơ jing pơ vei jang tơ bôl Việt Nam – Lào păng 45 sơ năm Năr kĭ Tơ chơ̆t jang tơ bôl păng jang hơ dai đơ̆ng 2 teh đak Việt Nam – Lào. Dôm nơ̆r tơ gop, pơ ma tơ̆ Hop akŏm tă kơ pơ ma hơ dăh đon tơ chĕng đơ̆ng kơ dră Hồ Chí Minh păng kơ dră Cay-sỏn Phôm-Vi-Hản ‘noh jĭ mŭk drăm kăp gĭt kơ 2 Đảng, 2 teh đak jĭ tơ drong ‘lơ̆ng đon tơ chĕng ăn bơ̆ jang đơ̆ng Đảng păng kach mang 2 teh đak, lơ̆m noh đei sơ năm mơ lôh Việt Nam păng Lào.

Hop akŏm pơ ma dơ nuh

Hơ năp jang chĭnh trĭ đơ̆ng jơ hnơr mơ lôh 2 teh đak Việt Nam păng Lào ‘noh jĭ hơ nơ̆ng hŏk pơ hrăm, vei răk păng pơm kiơ̆ đon tơ chĕng đơ̆ng kơ dră Hồ Chí Minh păng đon tơ chĕng đơ̆ng Kơ dră Cay-xỏn Phôm-Vi-Hản. Dôm bơ ngai tang măt kŭm pơ ma hơ dăh: Jơ hnơr mơ lôh 2 teh đak Việt Nam - Lào jĭ jơ hnơr pơ tăl tơ drong jang kach mang, hơ tŏk tơ iung păng pơm ‘lơ̆ng tơ drong tơ bôl păng tơ goăt 1 jơ hngơ̆m đon gĭt kăl Việt Nam – Lào.

Thuem: Tơ blơ̆