VOV4.Bahnar - Yak hlŏh dôm tơ drong mơ mat tat đơ̆ng jĭ Covid-19, đe đoàn viên, druh dăm lơ̆m tĕh đak tơ lĕch lơ trong jang tôch rơ gei, tơ gŭm ăn kon pơ lei jĭ Covid-19 păng khul jang tang găn jĭ blŭng a. Tơ drong ‘nŏh tơ ƀôh hơ dăh tơ drong druh kiơ̆ tơ tom, bơ̆ jang hơ bĕch hơ bal đơ̆ng sơ năm mơ lôh mă đei tơ drong kiơ păng jang đei lơ tơ drong ‘lơ̆ng hơ iă.          

Khei 5/2021, Khul druh dăm jang tơ gŭm dôm dêh char găh Tu tơ lĕch lơ tơ drong jang vang tơ gop tơ gŭm bơ̆n tơ mam xa, che gom, đak pơ gang pơ lôch pơ rang jĭ ăn dôm dêh char Hà Nam, Vĩnh Phúc, plt Hà Nội. Lơ̆m nŏh, môk kơ mĭl găn đak hai tơ prăt đei đe đoàn viên druh dăm pơm tôch đei yoa lơ̆m tơ drong tang găn jĭ tơ pŏh. Lăp lơ̆m 3 năr bơ̆ jang Đinh Thị Ngọc Thảo, kŭm hăm dôm bơ ngai lơ̆m khul jang tơ gŭm tơ̆ Hnam Ký túc xă Pháp Vân, Hà Nội hlôi pơm đei 1000 tŏ môk kơ mil pĕng găn đak hai tơ prăh gơih ăn anih đei jĭ: “Hrŭk hơ băn ao dreng kơ khul jang tơ gŭm, grŭp nhôn tôch hơ iă mưh đei Khul Trung ương păng rim khul grŭp pơ jao pơm kơ mĭl găn đak hai tơ prăh, hăm đon hơ pơi ‘mĕh tơ gop tŏ sĕt jơ hngâm ăn tơ drong jang tang găn jĭ.”

Ƀât mă jĭ Covid-19 oei tôch hơ mơt, sơ năm mơ lôh lơ̆m tĕh đak oei tơ lĕch jang pơm lơ tơ mam pha ra băl tôch đei yoa vă tơ gŭm ăn kon pơ lei jĭ Covid-19 păng đe kăn ƀô̆ bơ̆ jang tang găn jĭ blŭng a. ‘Nŏh jĭ giơng pơm hăm hla ar Catong ming tơ̆ dôm anih oei hơ drô̆; lơ lăm set hơ len jĭ ăn bơ ngai jang pơ gang dăh mă “Ao pơm rơ ngơp” mưh hrŭk sư pơm rơ ngơp hơ kâu ăn khul jang pơ gang chă iŏk set hơ len jĭ ăn đe lơ̆m dôm năr ‘năr tŏ… Dôm tơ mam âu tôch đei yoa tơ gŭm ăn khul jang pơ gang tang găn jĭ blŭng a sơ đơ̆ng jơ hngâm ƀiơ̆.

Ƀât mă kơ sô̆ bơ ngai F0 tơ̆ Hà Nội tŏk lơ ƀât blŭng sơ năm 2022, Khul druh dăm Hà Nội tơ lĕch tơ drong jang ATM oxy, hơ nhăk oxy truh tơ gŭm ăn kon pơ lei jĭ F0 oei hơ met tơ̆ hnam. Mŏ Nguyễn Thị Phương Dung, Bí thư Đoàn kuơ̆n Tây Hồ ăn tơ băt: Trong jang ATM oxy tơ gŭm ăn bơ ngai jĭ sơ đơ̆ng jơ hngâm hơ met jĭ tơ̆ hnam hai, tơ jur ƀiơ̆ tơ drong hrăt hrot tơ̆ hnam pơ gang hai, mŏ tơ roi:  “Khul druh dăm tơ̆ tơ ring bơ̆ jang lơ tơ drong tơ gŭm tang găn jĭ tơ̆ tơ ring. Druh dăm vang jang lơ̆m dôm khul tơ gŭm ăn F0, chơ chuĕn oxy truh tơ̆ hnam, jang hăm Khul ƀok thây pơ gang oei mơ lôh, Tổng đài 1022 tơ gŭm ăn bơ ngai jĭ hơ met jĭ tơ̆ hnam. ‘Ngoăih kơ ‘nŏh pơ jing lơ khul druh dăm tơ gŭm ƀet bơ̆ng, pơ dŭ dôm tơ mam yoa kăl ăn bơ ngai jĭ oei hơ met jĭ tơ̆ hnam.”

Ưh lăp rơ gei lơ̆m tơ drong tơ gŭm ăn bơ ngai jĭ F0 păng khul tang găn jĭ blŭng a đĕch, lơ̆m hlŏh 2 sơ năm âu ki, rơ bâu ‘nu druh dăm ‘nŏh jĭ y ƀak si oei mơ lôh, sinh viên hŏk y, đe linh hrŭk ao blue kok vang năm bơ̆ jang tang găn jĭ tơ̆ lơ anih. Hlŏh 2 khei mât tơ̆ plt Hồ Chí Minh kŭm hăm bơ ngai jĭ tơ jră hăm jĭ Covid-19, Thak si – ƀak si Đỗ Doãn Bách, jang tơ̆ Anih hơ met jĭ plei nuih, Hnam pơ gang Bạch Mai băt hơ dăh dôm tơ drong hơ pơi ‘mĕh đơ̆ng bơ ngai jĭ F0 hơ met tơ̆ hnam, ƀât mă hnam pơ gang hrăt hrot bơ ngai jĭ. Ƀak si Đỗ Doãn Bách kŭm hăm bôl boăl pơ jing păng tơ mât yoa “Khul jang pơ gang vang yak hơ dai” chă sơng iŏk, roi tơ ƀôh ăn 150 rơ bâu ‘nu bơ ngai F0 hơ met jĭ tơ̆ hnam: “Lơ̆m khei ‘năr jur tơ̆ tơ ring pơ băh tang găn jĭ, inh ‘mĕh plang jơ hngâm, ‘mĕh tơ gŭm ăn kon pơ lei. Kơ plăh dŏh khul jang pơ gang vang yak hơ doi đei pơ jing, inh iŏk đei lơ nơ̆r krao đơ̆ng kon pơ lei, inh hơ mĕng gơ̆h pơ lung đe sư, roi tơ ƀôh tơ drong jĭ ăn đe sư. Lơ̆m khul ƀok thây pơ gang vang yak hơ doi, inh kŭm iŏk jang tơ drong chă rơih, pơ tho ăn khul jang pơ gang găh trong pơ tho tơ ƀôh, tơ gŭm ăn bơ ngai jĭ hơ met jĭ tơ̆ hnam. Hrei ‘nâu khul đei dang 12 rơ bâu ‘nu bơ ngai ‘nŏh jĭ bơ ngai jang pơ gang.”    

Ưh lăp pơ chĕh rơ gei vă druh kiơ̆ tom tơ drong jĭ đĕch, sơ năm 2021, sơ năm mơ lôh Việt Nam oei tơ lĕch 2,2 triu nơ̆r pơ ma, đon tơ chĕng kiơ̆ đơ̆ng dôm tơ drong, lơ̆m nŏh đei hlŏh 74 rơ bâu đon tơ chĕng rơ gei đơ̆ng anih jang đoàn tơ̆ lơ tơ ring tơ gŭm, bơ̆ jang kiơ̆. Kiơ̆ ‘nhŏng Ngô Văn Cương, Bí thư Trung ương Đoàn TNCS Hồ Chí Minh: Anih jang đoàn hơ nơ̆ng pơ jing anih bơ̆ jang, ngôi pơ chơt ‘lơ̆ng vă đe bôl boăl mơ lôh gơ̆h đei tơ drong ‘lơ̆ng tưk tơ iung đon pơ chĕh rơ gei păng tơ gŭm bơ̆ jang đei dôm đon tơ chĕng ‘nŏh: “Trung ương Đoàn đei Trang điên tư chih akŏm đĭ đăng đon tơ chĕng, pơ chĕh rơ gei đơ̆ng bôl boăl mơ lôh lơ̆m tĕh đak. Đơ̆ng rŏng kơ ‘nŏh, nhôn pơ jao ăn dôm anih jang đoàn dêh char, plt chă hơ len năng dôm đon tơ chĕng ‘nŏh hăm gơ̆h jang kiơ̆ ưh vă tơ gŭm, pơ jing tơ drong ‘lơ̆ng ăn đe druh dăm bơ̆ jang đei tơ drong pơ chĕh rơ gei đơ̆ng kơ dih ‘nŏh.”

Hăm tơ drong tơ gŭm đơ̆ng anih jang Đoàn, lơ̆m rim tơ drong, sơ năm mơ lôh Việt Nam vă hơ nơ̆ng tưk tơ iung đon pơ chĕh rơ gei, đon hơ pơi ‘mĕh plang jơ hngâm, tơ gop jơ hngâm pran đơ̆ng bơ ngai oei mơ lôh ăn tơ drong jang tŏk kơ tĕh đak.

Phương Thoa: Chih

Dơ̆ng: Tơ blơ̆