Anih jang Trung ương Đảng 'nao tơlĕch Tơbang Sơkơ̆t đơ̆ng Tổng Bí thư Tô Lâm ah jơ pơm jang hăm Anih tơm Nô̆i vŭ gah tơdrong pơkăp anih jang kơ teh đak pơm kiơ̆ sơnong pơtrŭt choh jang xa tơ̆ tơring ah mă iŏk yua jơnŭm pơgơ̆r 2 tăl. Kiơ̆ kơ noh, Tổng Bí thư pơgơ̆r dah băt hơdah tôm sơnong jang, tơdrong kăp gĭt kơ choh jang xa păng sơnong jang hơtŏk choh jang xa lơ̆m hơtŏk mŭk drăm, tơpôl, pơjing tơring tơrang 'nao, hơtŏk tơdrong hơrih ăn Kon pơlei kiơ̆ trŏ nhen tơchơ̆t "choh jang xa jing tơdrong pran kơ teh đak, jing anih dơnơm kơ tơdrong jang mŭk drăm"; sơkơ̆t hơdah pơtrŭt choh jang xa jing sơnong jang kăp gĭt kơ jơnŭm pơgơ̆r xah.

Gah pơgơ̆r pơm jang, tơ̆ dêh char, pơlei tơm pơtoi dôm Anih pơtrŭt choh jang xa, mă tơm noh pơtho tơƀôh, pơgơ̆r jang, chă hơlen păng tơgŭm ăn xah. Ưh đei akŏm dôm Anih pơtrŭt choh jang xa lơ̆m tơring, tơroh xah. Rim xah pơjing anih jang kăp gĭt gah lơ tơdrong jang. Pơtoi hơmet hơtŏk tơdrong jang đei jơnei kơ dôm Jơnŭm pơtrŭt choh jang xa lơ̆m pơlei pơla, hơtŏk tơroi tơbăt gah tơdrong hlôh vao lơ̆m pơm jang, tơgŭm, pơtho bơngai jang mir hơtŏk choh jang xa. Rim tơring pơkăp pơjing anih jang tơ̆ xah keh đang hơdrol kơ năr 30/10/2025.