VOV4.Bahnar - Tơ̆ Dak Lăk, mơ̆t hŏk sơnăm hŏk ‘nao oei đei trŭh mơjĭt ‘nu hŏk tro, sinh viên Lào năm hŏk pơhrăm. Sơnăm hŏk au, đei vă jê̆ 60 ‘nu sinh viên – hŏk tro Lào năm hŏk tơ̆ rim hnam trương lơ̆m dêh char Dak Lăk. Hăm tơdrong lăng ba kơ jăp, tơdrong tơgŭm djru đơ̆ng Khŭl kơdră chĕp pơgơ̆r păng rim hơnĭh jang, hnam trương, rim đe ŏh tŏk bŏk hơdrin hŏk pơhrăm vă pơjing tơdrong hơpơi ‘mĕh vă đơ̆ng kơ dĭh đei jing tơpă.          

Sinh viên Thidphaphone Duangphachanh tŏk bŏk hŏk tơ̆ Hnam trương Đăi hŏk Tây Nguyên

Sinh viên Thidphaphone Duangphachanh (25 sơnăm, pơlei oei tơ̆ dêh char Attapeu, tĕh đak Cộng hòa Dân Chủ nhân dân Lào) tŏk bŏk hŏk pơhrăm Tơdrong jang Pơgang kơ Hnam trương Đăi hŏk Tây Nguyên (pơlei tơm Buôn Ma Thuột, dêh char Dak Lăk) tơroi tơbăt: Đơ̆ng vă đĭ sơnăm 2017, ŏh năm hŏk găh tơdrong jang pơgang ‘moi kiơ̆ tĕh đak tơgŭm ăn kon jên hŏk pơhrăm. Vă jê̆ 6 sơnăm hŏk pơhrăm tơ̆ au, yak hlŏh băt dôm yơ tơdrong tơnap tap, chrĭh chrĕng kơ tơdrong joăt joe lơ̆m oei sa, pơma dơnŭh, hăm tơdrong tơgŭm djru đơ̆ng hnam trương, ƀok thây kô păng bôl boăl, Thidphaphone roi năr roi joăt hăm tơdrong oei sa hle, hŏk pơhrăm iŏk đei jơnei hơ iă, ƀrư̆ ƀrư̆ pơm ăn tơdrong ‘mĕh vă pơm ƀok thây pơgang đei jing tơpă.“Rơ̆ih iŏk hŏk jang pơgang ‘nŏh kơ yuơ ba ‘mĕh vă, kơ yuơ hŏk jang pơgang ‘nŏh vă kơbăt, vă vei lăng năng tông jơhngơ̆m jăn ăn bơngai jĭ păng ming hơmet jĭ jăn. Mă tơpă hŏk jang pơgang ‘nŏh mơmat tơpă mơ̆n mă lei nơ̆r pơma jei mơmat mơ̆n, adoi tơnap mă hlôh vao dơ̆ng, kălđei hŏk pơhrăm lơ tơdrong dơ̆ng. Ĭnh tơchĕng gô vă brŏk vĭh tơ̆ Lào bơ̆ jang vă tơgŭm djru ăn kon pơlei”.

Khŭl tơgoăt tơgoăl Việt Nam - Lào dêh char Dak Lăk pôk tơmam drăm ăn hŏk tro Lào tŏk bŏk hŏk pơhrăm tơ̆ Hnam trương jăl ƀar Pêng Tĕh đak rong ‘me Tây Nguyên

Găh ŏh Chansida Inthakhong (18 sơnăm, oei tơ̆ dêh char Sê Kông, tĕh đak Cộng hòa Dân Chủ nhân dân Lào) tŏk bŏk hŏk jăl pêng Hnam trương jăl ƀar Pêng Tĕh đak rong ‘me Tây Nguyên găh Dơnŏ anĭh tơm Ƀô̆ đô̆i vei lăng sơlam Tĕh đak pơjing lơ̆m pơlei tơm Buôn Ma Thuột ‘nŏh tơvăt: Vă jê̆ 4 sơnăm oei tơ̆ Dak Lăk, ŏh hlôi joăt hăm tơdrong oei sa lơ̆m hnam trương ‘moi kiơ̆ tơdrong oei sa kơ Khŭl Ƀô̆ đô̆i. “Oei sa lơ̆m hnam trương ‘nŏh ‘moi kiơ̆ tơdrong oei sa kơ khŭl ƀô̆ đô̆i, găh jơ ‘năr ‘nŏh vei lăng tôch kơ hret. Sơ̆ jei tơnap tap tơpă mơ̆n mă lei đei hnam trương lăng ba, găh tơdrong hŏk pơhrăm, sŏng sa, ƀet vaccine mư̆h đei jĭ hơbŭh Covid. Hăm ĭnh jĭ mĭnh ‘nu bơngai atăih kơ ŭnh hnam năm hŏk tơ̆ Việt Nam, kiơ̆ kơ ĭnh hnam trương au nhen lĕ ŭnh hnam kơdĭh, lăng ba bơ̆n tôch kơ ‘lơ̆ng, rim bôl boăl jei oei sa pơma dơnŭh dĭh băl tôch rơhăo, ngăl chă tơgŭm ĭnh lơ tơdrong”.

Jang kiơ̆ bơ̆ jang pơm ‘nhŏng ŏh păng drơ̆ng mĭnh nơ̆r vang jang hơdoi bơ̆ jang ƀar păh dêh char Dak Lăk hăm rim dêh char găh pơbăh tĕh đak Lào, đơ̆ng sơnăm 2018 trŭh dang ei, hlôi đei kơ hrĕng ‘nu hŏk tro, sinh viên Lào tŏk bŏk hŏk pơhrăm tơ̆ Hnam trương Đăi hŏk Tây Nguyên păng Hnam trương jăl ƀar pêng tĕh đak rong ‘me Tây Nguyên ‘moi kiơ̆ trong hŏk pơhrăm tĕh đak tơgŭm ăn kon jên hŏk pơhrăm. Lơ̆m khei ‘năr hŏk pơhrăm, rim hŏk tro Lào năm hŏk tơ̆ au đei pơjing rơvơn nhen: ăn oei sa đĕch lơ̆m hnam trương, tơgŭm ăn kon jên rim khei, vang pơgơ̆r sa Têt joăt joe Bunpimay kơ bơngai Lào tơ̆ Buôn Đôn, pơgơ̆r tơ ƀơ̆p mŭh măt rim jơhnơr hŏk tro Lào hŏk pơhrăm tơ̆ Dak Lăk.

Ƀok Nguyễn Ngọc Phan, Kơdră chĕp pơgơ̆r Hnam trương jăl ƀar Pêng Tĕh đak rong ‘me Tây Nguyên tơbăt, sơnăm hŏk au hnam trương đei 45 ‘nu hŏk tro Lào tŏk bŏk hŏk pơhrăm. Atŭm hăm kon jên hŏk pơhrăm kơ yuơ Tĕh đak tơgŭm ăn, hnam trương jei hơdrin chă hơvơn đơ̆ng tơpôl vă atŏk ‘lơ̆ng tơdrong pơtho pơhrăm ăn rim đe ŏh.“Đĭ đăng kon jên hŏk pơhrăm kơ đe ŏh ‘nŏh kơ yuơ kơ hnam trương, kơ yuơ kang ƀô̆, ƀok thây kô hnam trương vă vang tơ iung pơjing khŭl bơ̆ jang atŏk tơ iung ăn khŭl bơ̆ jang tơring kơlang atŏk tơ iung adoi nhen tơdrong tơgoăt tơgoăl kơ ƀar tĕh đak. Lơ̆m khei năr kơnh ‘nŏh nhôn gô hơdrin iung jang hơdoi hăm dêh char Sê Kông adoi nhen rim dêh char Pơbăh kơ tĕh đak Lào, pơjing đei khŭl bơ̆ jang, atŏk tơ iung lơ̆m pơtho pơhrăm roi năr roi ‘lơ̆ng hơ iă hlŏh dơ̆ng”.

Kiơ̆ đơ̆ng ƀok Lê Văn Nghĩa, Kơdră chĕp pơgơ̆r Khŭl Tơgoăt tơgoăl Việt Nam – Lào dêh char Dak Lăk, kiơ̆ yok tơdrong tơgoăt tơgoăl ‘lơ̆ng liĕm, tơklep dĭh băl kơ jăp ƀar păh tĕh đak Việt Nam – Lào, Dak Lăk sơkơ̆t hơdăh mĭnh lơ̆m dôm tơdrong jang tơm ‘nŏh jang ‘lơ̆ng bơ̆ jang pơtho pơhrăm ăn rim hŏk tro, sinh viên Lào năm hŏk pơhrăm tơ̆ dêh char. Khŭl dêh char Dak Lăk hlôi iung jang hơdoi, tơgŭm djru, dăr lăng kơ jăp bơ̆ jang pơtho pơhrăm, pơjing rơvơn ‘lơ̆ng hlŏh ăn vă jê̆ 60 ‘nu hŏk tro sinh viên Lào tŏk bŏk hŏk pơhrăm tơ̆ rim hnam trương lơ̆m dêh char Dak Lăk. Kiơ̆ yok rim tơdrong hlôi iŏk đei jơnei, Khŭl tơgoăt tơgoăl 2 dêh char gô hơnơ̆ng jang kiơ̆ kơ jăp hlŏh dơ̆ng Hla bơar drơ̆ng mĭnh nơ̆r, tơ iung pơjing dôm trong vă jang hơdăh kơ 2 păh. Vei kơ jăp tơbăt dĭh băl, pơma dơnŭh dĭh băl păng jang hơdoi kơ jăp vă tơlĕch ‘lơ̆ng bơ̆ jang pơtho pơtho pơhrăm, ăn hŏk tro chă năm hŏk tơ̆ dĭh băl.“Bơ̆n tơgŭm djru, pơjing rơvơn đơ̆ng găh kon bơngai, hơnĭh jang, pơjing dôm tơdrong rơvơn ‘lơ̆ng hơ iă hlŏh vă vei lăng năng tông ăn tơdrong pơtho pơhrăm ăn rim đe sau bơngai Lào oei lơ̆m dêh char. Nhôn hlôi apĭnh Khŭl kơdră chĕp pơgơ̆r Đảng dêh char, chĕp pơgơ̆r păng pơrô̆ jang pơm ‘nhŏng ŏh ƀar păh kon pơlei dêh char Dak Lăk hăm rim đe sau hŏk tro oei jang vă ‘moi kiơ̆ trong au rim đe sau đei ŭnh hnam ‘lơ̆ng hơ iă tơ̆ dêh char Dak Lăk vă vei kơ jăp tơdrong oei sa joăt joe păng pơjing ăn đe sau sơđơ̆ng jơhngơ̆m đon hŏk pơhrăm. Nhôn gô hơnơ̆ng chă hơvơn tơpôl vang tơgŭm djru kon jên hu vă tơgŭm ăn jang kiơ̆ drơ̆ng mĭnh nơ̆r iung jang hơdoi bơ̆ jang kơ 2 Khŭl tơgoăt tơgoăl ƀar dêh char Dak Lăk hăm Sê Kông. Ƀar Khŭl tơgoăt tơgoăl 2 dêh char gô hơnơ̆ng iung jang hơdoi dăr lăng hơlen tơdrong iŏk đei jơnei lơ̆m vei lăng năng tông, pơtho pơhrăm kơ Hnam trương jăl ƀar Pêng Tĕh đak rong ‘me Tây Nguyên găh Dơnŏ anĭh tơm Ƀô̆ đô̆i vei lăng sơlam Tĕh đak păng Hnam trương Đăi hŏk Tây Nguyên hăm rim đe hŏk tro, sinh viên kơ tĕh đak CHDCND Lào tŏk bŏk hŏk pơhrăm lơ̆m 2 hnam trương au”.

Sơnăm hŏk ‘nao 2022-2023 hlôi đei hŏk pơhrăm. Atŭm hăm hŏk tro Việt Nam, dôm bơngai hŏk tro Lào tŏk bŏk hŏk pơhrăm tơ̆ Dak Lăk hơnơ̆ng iung jang kiơ̆ jơhngơ̆m đon hơpơi ‘mĕh vă, kơrŭn đĭ jơhngơ̆m pơhrăm vă brŏk vĭh tơ iung pơjing pơlei pơla roi năr roi pơdrŏng ‘lơ̆ng liĕm hlŏh dơ̆ng.

Bơngai chĭh: H’Xíu

Tơblơ̆ nơ̆r: Amazưt