Sơnăm mơlôh tơ̆ 13 kơđông linh vei lăng tơring sơlam păng dôm khul linh găh Tiểu đoàn Huấn luyện – Cơ động, Khul linh đak dơsĭ vei lăng tơring sơlam găh Anih chĕp kơ̆l pơgơ̆r Ƀô đô̆i vei lăng tơring sơlam dêh char Đắk Lắk hrơ̆ch năm bơ̆ jang vei lăng sơđơ̆ng tơdrong arih xa tơpôl nhen năm ngôi, jet gia pơma nuh, hơpăh tơmam ăn dôm unh hnam đei tơdrong arih xa mơmat tat, unh hnam đei kŏng; hơpăh jên hŏk ƀŏng hŏk tro tơnŭh adrin hŏk; pơm hơmet ming lơ anih gĭt kăl tơ̆ tơring sơlam lơ̆m đak dơsĭ păng tơ̆ kông.

Tơdrong hơiă hloh đơ̆ng sơnăm mơlôh kơ Linh vei lăng tơring sơlam Đắk Lắk ƀât ‘măng mă âu ‘nŏh bơ̆ jang roi tơbăt luơ̆t găh tơdrong pơm tơm tơ̆ đak dơsĭ, kông đak dơsĭ, vei lăng sơđơ̆ng tơ̆ tơring sơlam, atŭm hăm ‘nŏh vang roi tơbăt hloi tơdrong pôk rơih bơngai tang măt Quốc hội jăl XVI păng Jơnŭm pơgơ̆r kon pơlei jơ̆p tơring đơ̆ng 2026-2031, akŏm găh hơnăp jang đơ̆ng kon pơlei lơ̆m năr pôk rơih. Kiơ̆ đơ̆ng noh, pơm hơtŏk đon hlôh vao chinh trĭ, đon tơnăp ăn đe đoàn viên, druh dăm, bơngai tăh hla tơ̆ tơring sơlam mư̆h bơ̆ jang hơnăp jang đơ̆ng kon pơlei, vang tơgop pơjing đei teh đak chĕp kơ̆l pơgơ̆r kiơ̆ khôi luơ̆t.