Ah kơsơ̆ măng, minh jăl trong man bê tông tơ̆ thôn Lầu Nàng, xah Ia Lốp, dêh char Đăk Lăk rơ-ông rơ-ang nơ̆r pơma dơnuh kơ dôm bơngai yak jơ̆ng pơtơ̆p hơkou jăn. Ah kơmăng jur, unh hơyuh jơ̆ng 'năr đei tơ̆k hơdah. Yă Vi Thị Phương, oei tơ̆ thôn Lầu Nàng chơt hơ-iă tơroi: tơdrong tơplih ou 'nao đei hloh tong hơnê̆ khei kơ ou, đơ̆ng đei trong tơlei unh hơyuh kơyuơ đe hơdruh tơdăm pơhlŏng năm jang chă pơlăp rok kiơ̆ jăl trong tơm kơ thôn. Tơdrong jang keh đang, jăl trong hlôi jing hơnih mă kon pơlei akŏm pơma dơnuh, pơtơ̆p hơkou jăn: “Sô̆ hơ-iă dêh, lơ̆m pơlei bu bu kŭng chơt, kơlih unh hơyuh đei tơ̆k hơdah jơ̆p jăl trong ăn đe mih ma duch nă vih vơ̆t ƀônh ƀŏ hloh, ƀôh jăl trong hơdah păng 'lơ̆ng hloh. Lơ̆m pơlei rom bơngai atŭm jơhngơ̆m vei lăng vă jăl trong roi năr roi 'lơ̆ng rŏ hloh”.

Jăl trong đei unh hơyuh ou jĭ minh lơ̆m lơ tơdrong jang lơ̆m pơkăp Tơdrong jang kơ đe Hơdruh tơdăm pơhnŏng năm jang ah khei pơdơh he sơnăm 2026 kơyuơ grŭp hơdruh tơdăm sinh viên Hnam trưng Đăi hŏk Nam Cần Thơ jang atŭm hăm đoan viên hơdruh tơdăm tơ̆ 2 xah Ia Lốp păng Ea Rốk, dêh char Đăk Lăk. Dôm tơdrong jang nhen hơmet hnam oei ăn unh hnam ƀơm kial phuơ̆t pơrăm, pơjing hơnih hŏk pơhrăm ăn hŏk tro hin dơnuh, pơm cham teh ƀŏng lŏng dah mă pơgơ̆r tơdrong jang tơplih rơm rĕk như̆a iŏk tơmam, adoi pơkăp truh dôm tơdrong kăl hơdah ăn kon pơlei tơring sơlam, pơm tơplih tơdrong hlôh vao gah vei lăng 'lơ̆ng cham char, vei lăng 'lơ̆ng jơhngơ̆m jăn.

'Nhŏng Ngân Văn Thành, Phŏ Kơdră Hơnih jang MTTQ Việt Nam xah, Ƀĭ thư Đoan xah Ia Lốp ăn tơbăt, dôm tơdrong jang adoi đei kon pơlei atŭm vang vei lăng, iŏk yua sơđơ̆ng, pơm pơ-'lơ̆ng ăn tơdrong pơhnŏng jang gơh đunh đai hloh: “Đe buăl đoàn viên, hơdruh tơdăm jang tơgŭm kon pơlei gah dôm tơdrong jang pơyua tơpă, pơyua 'lơ̆ng ăn kon pơlei tơ̆ tơring. Dôm tơdrong jang nhen Tơ̆k hơdah trong pơlei pơla đei kon pơlei tôch hmach bơnê, oei tơdrong pơjing cham teh ƀŏng lŏng noh hơtŏk tơdrong pơtơ̆p 'lơ̆ng hơkou jăn ăn đe đoàn viên, hơdruh tơdăm păng kon pơlei”

Hăm đe buăl mơlôh, tơdrong pơhnŏng jang oei hơ-'nhăk dôm tơdrong kăp gĭt gah tơdrong jang tơ̆ tơring sơlam Đăk Lăk. Hăm lơ sinh viên, 'nou jĭ 'măng mă blŭng juă jơ̆ng truh tơring sơlam, kơtă tơƀơ̆p đe kang ƀô̆ linh tŏk bŏk oei pơm jang păng bơ̆ng pang tơdrong hơrih kon pơlei oei ƀơm lơ tơnap tap. Sinh viên Nguyễn Phú Quý, hnam trưng đăi hŏk Nam Cần Thơ tơroi: “Ah mă inh iŏk jang tơdrong mă 'noh, inh tôch kơ chơt hơ-iă. Inh 'noh bơngai sơnăm mơlôh, 'noh inh oei pran, đei jơhngơ̆m 'lơ̆ng păng chă tơchăr gơh hơgei noh inh gô adrin atŭm hăm đe bôl buăl sinh viên vă jang tơgŭm ăn rim bơngai”.

Rim tơdrong jang jĭ minh tơdrong jang iĕ ioch, mă lei ah pơtơm đơ̆ng tơdrong mă kon pơlei kăl păng đei pơm jang hăm jơhngơ̆m đon tơnăp kơ đe sơnăm mơlôh, dôm tơdrong tơgop noh tŏk bŏk oei pơjing đei tơdrong tơplih kăp gĭt ăn pơlei pơla tơring sơlam Đăk Lăk.